یہ آدمی کی گزر گاہ شاہراہ حیات

یہ آدمی کی گزر گاہ شاہراہ حیات

ہزاروں سال کا بار گراں اٹھائے ہوئے

جبیں پہ کاتب تقدیر کی جلی تحریر

گلے سے سیکڑوں نقش قدم لگائے ہوئے

گزرتے وقت کے گرد و غبار کے نیچے

حسین جسم کی تابندگی چھپائے ہوئے

گزشتہ دور کی تہذیب کی منازل کو

جوان ماں کی طرح گود میں سلائے ہوئے

یہ آدمی کی گزر گاہ شاہراہ حیات

ہزاروں سال کا بار گراں اٹھائے ہوئے

ادھر سے گزرے ہیں چنگیز و نادر و تیمور

لہو میں بھیگی ہوئی مشعلیں جلائے ہوئے

غلاموں اور کنیزوں کے کارواں آئے

خود اپنے خون میں ڈوبے ہوئے نہائے ہوئے

شکستہ دوش پہ دیوار چین کو لادے

سروں پہ مصر کے احرام کو اٹھائے ہوئے

جلال شیخ و شکوہ برہمنی کے جلوس

ہوس کے سینوں میں آتش کدے چھپائے ہوئے

جہالتوں کی طویل و عریض پرچھائیں

توہمات کی تاریکیاں جگائے ہوئے

سفید قوم کے عیار تاجروں کے گروہ

فریب و مکر سے اپنی دکاں سجائے ہوئے

شکست خوردہ سیاسی گداگروں کے ہجوم

ادب سے ٹوٹی ہوئی گردنیں جھکائے ہوئے

غموں سے چور مسافر تھکے ہوئے راہی

چراغ روح کے دل کے کنول بجھائے ہوئے

یہ آدمی کی گزر گاہ شاہراہ حیات

ہزاروں سال کا بار گراں اٹھائے ہوئے

نئے افق سے نئے قافلوں کی آمد ہے

چراغ وقت کی رنگین لو بڑھائے ہوئے

بغاوتوں کی سپہ انقلاب کے لشکر

زمیں پہ پاؤں فلک پہ نظر جمائے ہوئے

غرور فتح کے پرچم ہوا میں لہراتے

ثبات و عزم کے اونچے علم اٹھائے ہوئے

ہتھیلیوں پہ لیے آفتاب اور مہتاب

بغل میں کرۂ ارض حسیں دبائے ہوئے

اٹھو اور اٹھ کے انہیں قافلوں میں مل جاؤ

جو منزلوں کو ہیں گرد سفر بنائے ہوئے

قدم بڑھائے ہوئے ہیں مجاہدان وطن

مجاہدان‌ وطن ہیں قدم بڑھائے ہوئے

ye admi ki guzar gah shahrah-e-hayat

hazaron sal ka bar-e-giran uthae hue

jabin pe katib-e-taqdir ki jali tahrir

gale se saikron naqsh-e-qadam lagae hue

guzarte waqt ke gard-o-ghubar ke niche

hasin jism ki tabindagi chhupae hue

guzishta dur ki tahzib ki manazil ko

jawan man ki tarah god mein sulae hue

ye admi ki guzar gah shahrah-e-hayat

hazaron sal ka bar-e-giran uthae hue

idhar se guzre hain changez-o-nadir-o-timor

lahu mein bhigi hui mashlen jalae hue

ghulamon aur kanizon ke karwan ae

khud apne khun mein dube hue nahae hue

shikasta dosh pe diwar chain ko lade

saron pe misr ke ehram ko uthae hue

jalal shaikh-o-shikwa barahmani ke julus

hawas ke sinon mein atish kade chhupae hue

jahalaton ki tawil-o-ariz parchhain

tawahhumat ki tarikiyan jagae hue

safed qaum ke ayyar tajiron ke giroh

fareb-o-makr se apni dukan sajae hue

shikast khurda siyasi gadagaron ke hujum

adab se tuti hui gardanen jhukae hue

ghamon se chur musafir thake hue rahi

charagh ruh ke dil ke kanwal bujhae hue

ye admi ki guzar gah shahrah-e-hayat

hazaron sal ka bar-e-giran uthae hue

nae ufuq se nae qafilon ki amad hai

charagh waqt ki rangin lo barhae hue

baghawaton ki sipah inqilab ke lashkar

zamin pe paon falak pe nazar jamae hue

ghurur fath ke parcham hawa mein lahrate

sabat-o-azm ke unche alam uthae hue

hatheliyon pe liye aftab aur mahtab

baghal mein kura-e-arz-e-hasin dabae hue

utho aur uth ke unhen qafilon mein mil jao

jo manzilon ko hain gard-e-safar banae hue

qadam barhae hue hain mujahidan-e-watan

mujahidan-e-watan hain qadam barhae hue