کل ایک تو ہوگی اور اک میں

کل ایک تو ہوگی اور اک میں

کوئی رقیب رفیق صورت

کوئی رفیق رقیب ساماں

مرے ترے درمیاں نہ ہوگا

ہماری عمر رواں کی شبنم

تری سیہ کاکلوں کی راتوں

میں تار چاندی کے گوندھ دے گی

ترے حسیں عارضوں کے رنگیں

گلاب بیلے کے پھول ہوں گے

شفق کا ہر رنگ غرق ہوگا

لطیف و پر کیف چاندنی میں

تری کتاب رخ جواں پر

کہ جو غزل کی کتاب ہے اب

زمانہ لکھے گا اک کہانی

اور ان گنت جھریوں کے اندر

مری محبت کے سارے بوسے

ہزار لب بن کے ہنس پڑیں گے

ہم اپنی بیتی ہوئی شبوں کی

سلونی پرچھائیوں کو لے کر

ہم اپنے عہد طرب کی شام و

سحر کی رعنائیوں کو لے کر

پرانی یادوں کے جسم عریاں

کے واسطے پیرہن بنیں گے

پھر ایک تو ہوگی اور اک میں

کوئی رقیب رفیق صورت

کو رفیق رقیب ساماں

مرے ترے درمیاں نہ ہوگا

ہوس کی نظروں کو تیرے رخ پر

جمال نو کا گماں نہ ہوگا

فقط مری حسن آزمودہ

نظر یہ تجھ کو بتا سکے گی

کہ تیری پیری کا حسن تیرے

شباب سے بھی حسین تر ہے

kal ek to hogi aur ik main

koi raqib-e-rafiq surat

koi rafiq-e-raqib saman

mire tire darmiyan na hoga

hamari umr-e-rawan ki shabnam

tiri siyah kakulon ki raton

main tar chandi ke gundh degi

tire hasin arizon ke rangin

gulab bele ke phul honge

shafaq ka har rang gharq hoga

latif-o-pur kaif chandni mein

tiri kitab-e-rukh jawan par

ke jo ghazal ki kitab hai ab

zamana likhega ik kahani

aur an ginat jhiriyon ke andar

miri mohabbat ke sare bose

hazar lab ban ke hans parenge

ham apni biti hui shabon ki

saloni parchhaiyon ko le kar

ham apne ahd-e-tarab ki sham o

sahar ki raanaiyon ko le kar

purani yadon ke jism uryan

ke waste pairahan banenge

phir ek to hogi aur ik main

koi raqib-e-rafiq surat

ko rafiq-e-raqib saman

mire tire darmiyan na hoga

hawas ki nazron ko tere rukh par

jamal-e-nau ka guman na hoga

faqat miri husn azmuda

nazar ye tujh ko bata sakegi

ke teri piri ka husn tere

shabab se bhi hasin tar hai