ذکر نہیں یہ فرزانوں کا

ذکر نہیں یہ فرزانوں کا

قصہ ہے اک دیوانوں کا

ماسکو، پیرس اور لندن میں

دیکھے میں نے تین شرابی

سرخ تھیں آنکھیں روح گلابی

نشۂ مے کا تاج جبیں پر

فکر فلک پر پاؤں زمیں پر

بے خبر اپنی لغزش پا سے

با خبر اپنے عہد وفا سے

دختر رز کے در کے بھکاری

اپنے قلب و نظر کے شکاری

پی لینے کے بعد بھی پیاسے

جام کی صورت چھلکے چھلکے

ابر کی صورت ہلکے ہلکے

مستی کی تلوار اٹھائے

فصل گل چہروں پہ کھلائے

قدم قدم پر بہک رہے تھے

مہک رہے تھے چہک رہے تھے

ایک نے شاید وہسکی پی تھی

دوسرے نے شمپین کی بوتل

تیسرے نے وہ پگھلی چاندی

وودکا کی سیال حسینہ

وہ شے جس کی تابش رخ سے

شیشے کو آ جائے پسینہ

میں نے ان نازک لمحوں میں

روح بشر کو عریاں دیکھا

عہد خزاں کا رنگ پریدہ

رنگ عہد بہاراں دیکھا

ظاہر دیکھا پنہاں دیکھا

ذکر نہیں یہ فرزانوں کا

قصہ ہے اک دیوانوں کا

رات نے اپنی کالی زباں سے

خون شفق کے دل کا چاٹا

چار طرف خاموشی چھائی

پھیل گیا ہر سو سناٹا

جنت پیرس کے پہلو میں

سین کی موجوں کو نیند آئی

ڈسنے لگی مجھ کو تنہائی

مے خانے میں جا کر میں نے

آگ سے دل کی پیاس بجھائی

رند بہت تھے لیکن وہ سب

اپنے نشے میں کھوئے ہوئے تھے

جاگ رہی تھیں آنکھیں لیکن

دل تو سب کے سوئے ہوئے تھے

کوئی نہیں تھا ان میں میرا

میں یہ بیٹھا سوچ رہا تھا

کب یہ ظالم رات کٹے گی

کب واپس آئے گا سویرا

اتنے میں اک قامت رعنا

قدم قدم پر پھول کھلاتا

ہونٹوں سے معصوم تبسم

آنکھوں سے بجلی برساتا

مے خانے میں جھوم کے آیا

ناز و ادا کے دام بچھاتا

عیش و طرب کی محبوبائیں

نشۂ مے کی دوشیزائیں

رہ گئیں اپنی آنکھیں مل کر

آئی قیامت چال میں ڈھل کر

سکوں کی جھنکار پہ گاتی

سونے کی تلوار نچاتی

اپنے لہو میں آپ نہاتی

اس نازک لمحے میں میں نے

حرص و ہوس کو رقصاں دیکھا

زد میں نظام زرداری کی

روح بشر کو لرزاں دیکھا

مجبوری کو عریاں دیکھا

ذکر نہیں یہ فرزانوں کا

قصہ ہے اک دیوانوں کا

گہرے کہرے کی لہروں میں

سارا لندن ڈوب گیا تھا

لمحوں کی روشن آنکھوں میں

شام کا کاجل پھیل چکا تھا

رات کی نیلی دیوی جاگی

دن کے دیوتا کو نیند آئی

ڈسنے لگی مجھ کو تنہائی

مے خانے میں جا کر میں نے

آگ سے دل کی پیاس بجھائی

اس محفل میں سب ہی کچھ تھا

ساقی بھی اور پیر مغاں بھی

صہبا کی آغوش کے پالے

طفلک مستی، رند جواں بھی

غازہ و رنگ کی معشوقائیں

جن کی لطافت شب بھر کی تھی

عطر اور ریشم کی مینائیں

جن کی صہبا لب بھر کی تھی

آج کا سکھ تھا، کل کا دکھ تھا

آج کی آشا، کل کی نراشا

ہنس ہنس کر غم دیکھ رہے تھے

ان جھوٹی خوشیوں کا تماشا

نا امیدی کے کاندھوں پر

رکھا تھا امید کا لاشہ

آج وہ لے لیں، جو مل جائے

کل کیا ہوگا کون بتائے

آج دلوں کی شمع جلائیں

کل شاید یہ رات نہ آئے

آج تو مے کی کشتی کھے لیں

کل یہ سفینہ ڈوب نہ جائے

آج لبوں کا بوسہ لے لیں

موت کا بوسہ کل لینا ہے

آج دلوں کا قرض چکا لیں

کل تو سب کچھ دے دینا ہے

اس نازک لمحے میں میں نے

روح بشر کو ویراں دیکھا

ایٹم بم کے خوف کے آگے

عقل و خرد کو حیراں دیکھا

سارے جہاں کو لرزاں دیکھا

ذکر نہیں یہ فرزانوں کا

قصہ ہے اک دیوانوں کا

دوش ہوا پر تاریکی نے

زلفوں کے خم کھول دیے تھے

ماسکو کی خاموش فضا میں

رات کی آنکھوں کے کاجل نے

کتنے جادو گھول دیے تھے

سرخ و سیہ مخمل کے اوپر

شام کے سایوں کو نیند آئی

ڈسنے لگی مجھ کو تنہائی

مے خانے میں جا کر میں نے

آگ سے دل کی پیاس بجھائی

خوش فکروں کا ابر بہاراں

جھوم پڑا تھا مے خانوں پر

بادہ کشوں کا رنگیں جھرمٹ

ٹوٹ پڑا تھا پیمانوں پر

ساز کی لے میں تیزی آئی

نشۂ مے کی انگڑائی نے

اپنا حسیں پرچم لہرایا

چپہ چپہ ذرہ ذرہ

قطرہ قطرہ رقص میں آیا

نغموں کے بے تاب بھنور کو

لب کے ٹکڑے چوم رہے تھے

رقص کے بیکل گردابوں میں

جسم کے طوفاں گھوم رہے تھے

چہروں کی روشن قندیلیں

بانہوں کی دلکش محرابیں

راگ نظر کی خاموشی کے

جنبش مژگاں کی مضرابیں

اس گردش میں درہم برہم

سارا نظام شمس و قمر تھا

پگھل گئے تھے چاند اور سورج

محفل گل میں رقص شرر تھا

رات کی پیشانی سے جیسے

تاروں کا جھومر ٹوٹ گیا ہو

پیر فلک کے ہاتھ سے جیسے

طشت زمرد چھوٹ گیا ہو

ہیرے، نیلم، لعل اور موتی

خاک پہ جیسے بکھر رہے ہیں

جیسے کسی کے برہم گیسو

بکھر بکھر کر سنور رہے ہوں

نشۂ مے کے سر پر لیکن

عقل و خرد کا تاج دھرا تھا

دور سے بیٹھا بیٹھا مجھ کو

ایک شرابی دیکھ رہا تھا

اس نے ہوا میں ہاتھ سے اپنے

ننھا سا اک بوسہ پھینکا

اک تتلی سی اڑتی آئی

میرے دل کے پھول کے اوپر

کچھ کانپی اور کچھ منڈلائی

بیٹھ گئی پر جوڑ کے دونوں

پیار کے رس کو چوس کے اٹھی

اور مری جانب سے ہوا میں

بوسہ بن کر پھر لہرائی

کچھ شرمائی، کچھ اترائی

اور شرابی میز سے اٹھ کر

رقص کے حلقوں سے ٹکراتا

کشتی کی صورت چکراتا

ہاتھ میں اپنا جام اٹھائے

میری جانب جھومتا آیا

خنداں خنداں، نازاں نازاں

رقصاں رقصاں، پیچاں پیچاں

موج ہوا کو چومتا آیا

میری زباں تھی اردو، ہندی

اس کی زباں تھی روسی لیکن

ایک زباں تھی ایسی بھی جو

دونوں زبانوں سے پیاری تھی

دونوں جس کو بول رہے تھے

چند اشارے چند تبسم

نظروں کا خاموش تکلم

حرف یہی تھے، لفظ یہی تھے

شہد جو دل میں گھول رہے تھے

ہند کی مستی، روس کا نقشہ

دونوں نے اک جام بنایا

اور ہوا میں اس کو نچایا

ساتھ ہمارے سب رندوں نے

اپنے دلوں کو ہاتھ میں لے کر

میرے وطن کا جام اٹھایا

اب جو میں نے مڑ کر دیکھا

جشن نہ تھا یہ دیوانوں کا

گرد ہمارے امن کی دیوی

گیت کی حوریں ساز کی پریاں

نغمے اور آواز کی لڑیاں

پیرس کی بد بخت حسینہ

مغرور امریکہ کا سپاہی

لندن کا بدمست شرابی

عیش و طرب کی محبوبائیں

نشۂ مے کی دوشیزائیں

غازہ و رنگ کی معشوقائیں

عطر اور ریشم کی مینائیں

حافظؔ اور غالبؔ کی غزلیں

پشکنؔ اور ٹیگورؔ کی نظمیں

کتنے ناز اور کتنی ادائیں

کتنی شیریں اور لیلائیں

کتنے رانجھے، کتنی ہیریں

کتنے بت، کتنی تصویریں

امن کی کوشش اور تدبیریں

مشرق و مغرب کی تقدیریں

حلقہ باندھے ناچ رہی تھیں

میں نے اس نازک لمحے میں

روح بشر کو نازاں دیکھا

نشہ و رقص کے پیچ و خم میں

پیار کا جذبہ رقصاں دیکھا

سارے جہاں کو خنداں دیکھا

ذکر نہیں یہ فرزانوں کا

قصہ ہے اک دیوانوں کا

zikr nahin ye farzanon ka

qissa hai ik diwanon ka

masko, pairis aur landan mein

dekhe main ne tin sharabi

surkh thin ankhen ruh gulabi

nasha-e-mai ka taj jabin par

fikr-e-falak par paon zamin par

be khabar apni laghzish pa se

ba khabar apne ahd-e-wafa se

dukhtar raz ke dar ke bhikari

apne qalb-o-nazar ke shikari

pi lene ke baad bhi pyase

jam ki surat chhalke chhalke

abr ki surat halke halke

masti ki talwar uthae

fasl-e-gul chehron pe khilae

qadam qadam par bahak rahe the

mahak rahe the chahak rahe the

ek ne shayad wosaki pi thi

dusre ne shampain ki botal

tisre ne wo pighli chandi

wodukka ki sayyal hasina

wo shai jis ki tabish rukh se

shishe ko a jae pasina

main ne un nazuk lamhon mein

ruh bashar ko uryan dekha

ahd-e-khizan ka rang-e-parida

rang ahd-e-baharan dekha

zahir dekha pinhan dekha

zikr nahin ye farzanon ka

qissa hai ik diwanon ka

rat ne apni kali zaban se

khun-e-shafaq ke dil ka chata

char taraf khamoshi chhai

phail gaya har su sannata

jannat pairis ke pahlu mein

sain ki maujon ko nind ai

dasne lagi mujh ko tanhai

mai khane mein ja kar main ne

ag se dil ki pyas bujhai

rind bahut the lekin wo sab

apne nashe mein khoe hue the

jag rahi thin ankhen lekin

dil to sab ke soe hue the

koi nahin tha un mein mera

main ye baitha soch raha tha

kab ye zalim rat kategi

kab wapas aega sawera

itne mein ik qamat raana

qadam qadam par phul khilata

honton se maasum tabassum

ankhon se bijli barasita

mai khane mein jhum ke aya

naz-o-ada ke dam bichhata

aish-o-tarab ki mahbubaen

nasha-e-mai ki doshizaen

rah gain apni ankhen mal kar

ai qayamat chal mein dhal kar

sukun ki jhankar pe gati

sone ki talwar nachati

apne lahu mein ap nahati

is nazuk lamhe mein main ne

hirs-o-hawas ko raqsan dekha

zad mein nizam-e-zardari ki

ruh bashar ko larzan dekha

majburi ko uryan dekha

zikr nahin ye farzanon ka

qissa hai ik diwanon ka

gahre kohre ki lahron mein

sara landan dub gaya tha

lamhon ki raushan ankhon mein

sham ka kajal phail chuka tha

rat ki nili dewi jagi

din ke dewta ko nind ai

dasne lagi mujh ko tanhai

mai khane mein ja kar main ne

ag se dil ki pyas bujhai

is mahfil mein sab hi kuchh tha

saqi bhi aur pir-e-mughan bhi

sahba ki aghosh ke pale

tiflak masti, rind jawan bhi

ghaza-o-rang ki maashoqaen

jin ki latafat shab bhar ki thi

itr aur resham ki minaen

jin ki sahba lab bhar ki thi

aj ka sukh tha, kal ka dukh tha

aj ki asha, kal ki nirasha

hans hans kar gham dekh rahe the

un jhuti khushiyon ka tamasha

na ummidi ke kandhon par

rakha tha ummid ka lasha

aj wo le len, jo mil jae

kal kya hoga kaun batae

aj dilon ki shama jalaen

kal shayad ye rat na ae

aj to mai ki kashti khe len

kal ye safina dub na jae

aj labon ka bosa le len

maut ka bosa kal lena hai

aj dilon ka qarz chuka len

kal to sab kuchh de dena hai

is nazuk lamhe mein main ne

ruh bashar ko wiran dekha

aitam bam ke khauf ke age

aql-o-khirad ko hairan dekha

sare jahan ko larzan dekha

zikr nahin ye farzanon ka

qissa hai ik diwanon ka

dosh hawa par tariki ne

zulfon ke kham khol diye the

masko ki khamosh faza mein

rat ki ankhon ke kajal ne

kitne jadu ghol diye the

surkh-o-siyah makhmal ke upar

sham ke sayon ko nind ai

dasne lagi mujh ko tanhai

mai khane mein ja kar main ne

ag se dil ki pyas bujhai

khush fikron ka abr-e-baharan

jhum para tha mai khanon par

bada kashon ka rangin jhurmut

tut para tha paimanon par

saz ki le mein tezi ai

nasha-e-mai ki angrai ne

apna hasin parcham lahraya

chappa chappa zarra zarra

qatra qatra raqs mein aya

naghmon ke be tab bhanwar ko

lab ke tukre chum rahe the

raqs ke bekal girdabon mein

jism ke tufan ghum rahe the

chehron ki raushan qindilen

banhon ki dilkash mehraben

rag nazar ki khamoshi ke

jumbish mizhgan ki mizraben

is gardish mein dirham barham

sara nizam-e-shams-o-qamar tha

pighal gae the chand aur suraj

mahfil gul mein raqs-e-sharar tha

rat ki peshani se jaise

taron ka jhumar tut gaya ho

pir-e-falak ke hath se jaise

tasht-e-zamurrad chhut gaya ho

hire, nilam, laal aur moti

khak pe jaise bikhar rahe hain

jaise kisi ke barham gesu

bikhar bikhar kar sanwar rahe hun

nasha-e-mai ke sar par lekin

aql-o-khirad ka taj dhara tha

dur se baitha baitha mujh ko

ek sharabi dekh raha tha

us ne hawa mein hath se apne

nanha sa ik bosa phenka

ik titli si urti ai

mere dil ke phul ke upar

kuchh kanpi aur kuchh mandlai

baith gai par jor ke donon

pyar ke ras ko chus ke uthi

aur miri janib se hawa mein

bosa ban kar phir lahrai

kuchh sharmai, kuchh itrai

aur sharabi mez se uth kar

raqs ke halqon se takrata

kashti ki surat chakarata

hath mein apna jam uthae

meri janib jhumta aya

khandan khandan, nazan nazan

raqsan raqsan, pechan pechan

mauj hawa ko chumta aya

meri zaban thi urdu, hindi

us ki zaban thi rusi lekin

ek zaban thi aisi bhi jo

donon zabanon se pyari thi

donon jis ko bol rahe the

chand ishare chand tabassum

nazron ka khamosh takallum

harf yahi the, lafz yahi the

shahd jo dil mein ghol rahe the

hind ki masti, ros ka naqsha

donon ne ik jam banaya

aur hawa mein us ko nachaya

sath hamare sab rindon ne

apne dilon ko hath mein le kar

mere watan ka jam uthaya

ab jo main ne mur kar dekha

jashn na tha ye diwanon ka

gard hamare amn ki dewi

git ki huren saz ki pariyan

naghme aur awaz ki lariyan

pairis ki bad bakht hasina

maghrur amaryakka ka sipahi

landan ka badmast sharabi

aish-o-tarab ki mahbubaen

nasha-e-mai ki doshizaen

ghaza-o-rang ki maashoqaen

itr aur resham ki minaen

hafiz aur ghalib ki ghazlen

pushkin aur tigor ki nazmen

kitne naz aur kitni adaen

kitni shirin aur lilaen

kitne ranjhe, kitni hiren

kitne but, kitni taswiren

amn ki koshish aur tadbiren

mashriq-o-maghrib ki taqdiren

halqa bandhe nach rahi thin

main ne is nazuk lamhe mein

ruh bashar ko nazan dekha

nasha-o-raqs ke pech-o-kham mein

pyar ka jazba raqsan dekha

sare jahan ko khandan dekha

zikr nahin ye farzanon ka

qissa hai ik diwanon ka