ناگہاں شور ہوا

ناگہاں شور ہوا

لو شب تار غلامی کی سحر آ پہنچی

انگلیاں جاگ اٹھیں

بربط و طاؤس نے انگڑائی لی

اور مطرب کی ہتھیلی سے شعاعیں پھوٹیں

کھل گئے ساز میں نغموں کے مہکتے ہوئے پھول

لوگ چلائے کہ فریاد کے دن بیت گئے

راہزن ہار گئے

راہرو جیت گئے

قافلے دور تھے منزل سے بہت دور مگر

خود فریبی کی گھنی چھاؤں میں دم لینے لگے

چن لیا راہ کے ریزوں کو خذف ریزوں کو

اور سمجھ بیٹھے کہ بس لعل و جواہر ہیں یہی

راہزن ہنسنے لگے چھپ کے کمیں گاہوں میں

ہم نشیں یہ تھا فرنگی کی فراست کا طلسم

رہبر قوم کی ناکارہ قیادت کا فریب

ہم نے آزردگئی شوق کو منزل جانا

اپنی ہی گرد سر راہ کو محمل جانا

گردش حلقۂ گرداب کو ساحل جانا

اب جدھر دیکھو ادھر موت ہی منڈلاتی ہے

در و دیوار سے رونے کی صدا آتی ہے

خواب زخمی ہیں امنگوں کے کلیجے چھلنی

میرے دامن میں ہیں زخموں کے دہکتے ہوئے پھول

خون میں لتھڑے ہوئے پھول

میں جنہیں کوچہ و بازار سے چن لایا ہوں

قوم کے راہبرو راہزنو

اپنے ایوان حکومت میں سجا لو ان کو

اپنے گلدان سیاست میں لگا لو ان کو

اپنی صد سالہ تمناؤں کا حاصل ہے یہی

موج پایاب کا ساحل ہے یہی

تم نے فردوس کے بدلے میں جہنم لے کر

کہہ دیا ہم سے گلستاں میں بہار آئی ہے

چند سکوں کے عوض چند ملوں کی خاطر

تم نے ناموس شہیدان وطن بیچ دیا

باغباں بن کے اٹھے اور چمن بیچ دیا

کون آزاد ہوا؟

کس کے ماتھے سے سیاہی چھوٹی

میرے سینے میں ابھی درد ہے محکومی کا

مادر ہند کے چہرے پہ اداسی ہے وہی

خنجر آزاد ہیں سینوں میں اترنے کے لیے

موت آزاد ہے لاشوں پہ گزرنے کے لیے

چور بازاروں میں بد شکل چڑیلوں کی طرح

قیمتیں کالی دکانوں پہ کھڑی رہتی ہیں

ہر خریدار کی جیبوں کو کترنے کے لیے

کارخانوں پہ لگا رہتا ہے

سانس لیتی ہوئی لاشوں کا ہجوم

بیچ میں ان کے پھرا کرتی ہے بیکاری بھی

اپنا خونخوار دہن کھولے ہوئے

اور سونے کے چمکتے سکے

ڈنک اٹھائے ہوئے پھن پھیلائے

روح اور دل پہ چلا کرتے ہیں

ملک اور قوم کو دن رات ڈسا کرتے ہیں

روٹیاں چکلوں کی قحبائیں ہیں

جن کو سرمایہ کے دلالوں نے

نفع خوری کے جھروکوں میں سجا رکھا ہے

بالیاں دھان کی گیہوں کے سنہرے خوشے

مصر و یونان کے مجبور غلاموں کی طرح

اجنبی دیس کے بازاروں میں بک جاتے ہیں

اور بد بخت کسانوں کی بلکتی ہوئی روح

اپنے افلاس میں منہ ڈھانپ کے سو جاتی ہے

ہم کہاں جائیں کہیں کس سے کہ نادار ہیں ہم

کس کو سمجھائیں غلامی کے گنہ گار ہیں ہم

طوق خود ہم نے پہنا رکھا ہے ارمانوں کو

اپنے سینے میں جکڑ رکھا طوفانوں کو

اب بھی زندان غلامی سے نکل سکتے ہیں

اپنی تقدیر کو ہم آپ بدل سکتے ہیں

آج پھر ہوتی ہیں زخموں سے زبانیں پیدا

تیرہ و تار فضاؤں سے برساتا ہے لہو

راہ کی گرد کے نیچے سے ابھرتے ہیں قدم

تارے آکاش پہ کمزور حبابوں کی طرح

شب کے سیلاب سیاہی میں بہے جاتے ہیں

پھوٹنے والی ہے مزدور کے ماتھے سے کرن

سرخ پرچم افق صبح پہ لہراتے ہیں

nagahan shor hua

lo shab-e-tar ghulami ki sahar a pahunchi

ungliyan jag uthen

barbat-o-taus ne angrai li

aur mutrib ki hatheli se shuaen phuten

khul gae saz mein naghmon ke mahakte hue phul

log chillae ke fariyad ke din bit gae

rahzan har gae

rahrau jit gae

qafile dur the manzil se bahut dur magar

khud farebi ki ghani chhaon mein dam lene lage

chun liya rah ke rezon ko khazaf rezon ko

aur samajh baithe ke bas laal-o-jawahir hain yahi

rahzan hansne lage chhup ke kamin gahon mein

ham nashin ye tha farangi ki firasat ka tilism

rahbar qaum ki nakara qiyadat ka fareb

ham ne azradgi shauq ko manzil jana

apni hi gard sar-e-rah ko mahmil jana

gardish halqa-e-girdab ko sahil jana

ab jidhar dekho idhar maut hi mandlati hai

dar-o-diwar se rone ki sada ati hai

khwab zakhmi hain umangon ke kaleje chhalni

mere daman mein hain zakhmon ke dahakte hue phul

khun mein lithre hue phul

main jinhen kucha-o-bazar se chun laya hun

qaum ke rahbaro rahzano

apne aiwan-e-hukumat mein saja lo un ko

apne guldan-e-siyasat mein laga lo un ko

apni sad sala tamannaon ka hasil hai yahi

mauj payab ka sahil hai yahi

tum ne firdaus ke badle mein jahannam le kar

kah diya ham se gulistan mein bahar ai hai

chand sakun ke ewaz chand milon ki khatir

tum ne namus-e-shahidan-e-watan bech diya

baghban ban ke uthe aur chaman bech diya

kaun azad hua?

kis ke mathe se siyahi chhoti

mere sine mein abhi dard hai mahkumi ka

madar-e-hind ke chehre pe udasi hai wahi

khanjar azad hain sinon mein utarne ke liye

maut azad hai lashon pe guzarne ke liye

chur bazaron mein bad shakl churailon ki tarah

qimaten kali dukanon pe khari rahti hain

har kharidar ki jebon ko katarne ke liye

karkhanon pe laga rahta hai

sans leti hui lashon ka hujum

bich mein un ke phira karti hai bekari bhi

apna khunkhwar dahan khole hue

aur sone ke chamakte sake

dank uthae hue phan phailae

ruh aur dil pe chala karte hain

mulk aur qaum ko din rat dasa karte hain

rotiyan chaklon ki qahbaen hain

jin ko sarmaya ke dallalon ne

nafa khuri ke jharokon mein saja rakha hai

baliyan dhan ki gehun ke sunahre khushe

misr-o-yunan ke majbur ghulamon ki tarah

ajnabi des ke bazaron mein bik jate hain

aur bad bakht kisanon ki bilakti hui ruh

apne iflas mein munh dhanp ke so jati hai

ham kahan jaen kahin kis se ke nadar hain ham

kis ko samjhaen ghulami ke gunah gar hain ham

tauq khud ham ne pahna rakha hai armanon ko

apne sine mein jakar rakha tufanon ko

ab bhi zindan-e-ghulami se nikal sakte hain

apni taqdir ko ham ap badal sakte hain

aj phir hoti hain zakhmon se zabanen paida

tira-o-tar fazaon se barasita hai lahu

rah ki gard ke niche se ubharte hain qadam

tare akash pe kamzor hababon ki tarah

shab ke sailab siyahi mein bahe jate hain

phutne wali hai mazdur ke mathe se kiran

surkh parcham ufuq subh pe lahrate hain