ہمچو سبزہ بارہا روئیدہ ایم

ہمچو سبزہ بارہا روئیدہ ایم

پھر اک دن ایسا آئے گا

آنکھوں کے دئیے بجھ جائیں گے

ہاتھوں کے کنول کمھلائیں گے

اور برگ زباں سے نطق و صدا

کی ہر تتلی اڑ جائے گی

اک کالے سمندر کی تہ میں

کلیوں کی طرح سے کھلتی ہوئی

پھولوں کی طرح سے ہنستی ہوئی

ساری شکلیں کھو جائیں گی

خوں کی گردش دل کی دھڑکن

سب راگنیاں سو جائیں گی

اور نیلی فضا کی مخمل پر

ہنستی ہوئی ہیرے کی یہ کنی

یہ میری جنت میری زمیں

اس کی صبحیں اس کی شامیں

بے جانے ہوئے بے سمجھے ہوئے

اک مشت غبار انساں پر

شبنم کی طرح رو جائیں گی

ہر چیز بھلا دی جائے گی

یادوں کے حسیں بت خانے سے

ہر چیز اٹھا دی جائے گی

پھر کوئی نہیں یہ پوچھے گا

سردارؔ کہاں ہے محفل میں

لیکن میں یہاں پھر آؤں گا

بچوں کے دہن سے بولوں گا

چڑیوں کی زباں سے گاؤں گا

جب بیج ہنسیں گے دھرتی میں

اور کونپلیں اپنی انگلی سے

مٹی کی تہوں کو چھیڑیں گی

میں پتی پتی کلی کلی

اپنی آنکھیں پھر کھولوں گا

سر سبز ہتھیلی پر لے کر

شبنم کے قطرے تولوں گا

میں رنگ حنا آہنگ غزل

انداز سخن بن جاؤں گا

رخسار عروس نو کی طرح

ہر آنچل سے چھن جاؤں گا

جاڑوں کی ہوائیں دامن میں

جب فصل خزاں کو لائیں گی

رہ رو کے جواں قدموں کے تلے

سوکھے ہوئے پتوں سے میرے

ہنسنے کی صدائیں آئیں گی

دھرتی کی سنہری سب ندیاں

آکاش کی نیلی سب جھیلیں

ہستی سے مری بھر جائیں گی

اور سارا زمانہ دیکھے گا

ہر قصہ مرا افسانہ ہے

ہر عاشق ہے سردارؔ یہاں

ہر معشوقہ سلطانہؔ ہے

میں ایک گریزاں لمحہ ہوں

ایام کے افسوں خانے میں

میں ایک تڑپتا قطرہ ہوں

مصروف سفر جو رہتا ہے

ماضی کی صراحی کے دل سے

مستقبل کے پیمانے میں

میں سوتا ہوں اور جاگتا ہوں

اور جاگ کے پھر سو جاتا ہوں

صدیوں کا پرانا کھیل ہوں میں

میں مر کے امر ہو جاتا ہوں

hamchau sabza barha roida aim

phir ik din aisa aega

ankhon ke diye bujh jaenge

hathon ke kanwal kamhlaenge

aur barg-e-zaban se nutq-o-sada

ki har titli ur jaegi

ik kale samundar ki tah mein

kaliyon ki tarah se khulti hui

phulon ki tarah se hansti hui

sari shaklen kho jaengi

khun ki gardish dil ki dharkan

sab ragniyan so jaengi

aur nili faza ki makhmal par

hansti hui hire ki ye kini

ye meri jannat meri zamin

us ki subhen us ki shamen

be jane hue be samjhe hue

ik musht-e-ghubar insan par

shabnam ki tarah ro jaengi

har chiz bhula di jaegi

yadon ke hasin but khane se

har chiz utha di jaegi

phir koi nahin ye puchhega

sardar kahan hai mahfil mein

lekin main yahan phir aunga

bachchon ke dahan se bolunga

chiriyon ki zaban se gaonga

jab bij hansenge dharti mein

aur konpalen apni ungli se

mitti ki tahon ko chherengi

main patti patti kali kali

apni ankhen phir kholunga

sar sabz hatheli par le kar

shabnam ke qatre tolunga

main rang-e-hina ahang ghazal

andaz-e-sukhan ban jaunga

rukhsar urus-e-nau ki tarah

har anchal se chhin jaunga

jaron ki hawaen daman mein

jab fasl-e-khizan ko laengi

rah ro ke jawan qadmon ke tale

sukhe hue patton se mere

hansne ki sadaen aengi

dharti ki sunahri sab nadiyan

akash ki nili sab jhelen

hasti se miri bhar jaengi

aur sara zamana dekhega

har qissa mira afsana hai

har ashiq hai sardar yahan

har maashuqa salatana hai

main ek gurezan lamha hun

ayyam ke afsun khane mein

main ek tarapta qatra hun

masruf-e-safar jo rahta hai

mazi ki surahi ke dil se

mustaqbil ke paimane mein

main sota hun aur jagta hun

aur jag ke phir so jata hun

sadiyon ka purana khel hun main

main mar ke amar ho jata hun