تمہارے لہجے میں جو گرمی و حلاوت ہے

تمہارے لہجے میں جو گرمی و حلاوت ہے

اسے بھلا سا کوئی نام دو وفا کی جگہ

غنیم نور کا حملہ کہو اندھیروں پر

دیار درد میں آمد کہو مسیحا کی

رواں دواں ہوئے خوشبو کے قافلے ہر سو

خلائے صبح میں گونجی سحر کی شہنائی

یہ ایک کہرا سا، یہ دھند سی جو چھائی ہے

اس التہاب میں، اس سرمگیں اجالے میں

سوا تمہارے مجھے کچھ نظر نہیں آتا

حیات نام ہے یادوں کا، تلخ اور شیریں

بھلا کسی نے کبھی رنگ و بو کو پکڑا ہے

شفق کو قید میں رکھا صبا کو بند کیا

ہر ایک لمحہ گریزاں ہے، جیسے دشمن ہے

نہ تم ملو گی نہ میں، ہم بھی دونوں لمحے ہیں

وہ لمحے جا کے جو واپس کبھی نہیں آتے!

tumhare lahje mein jo garmi-o-halawat hai

use bhala sa koi nam do wafa ki jagah

ghanim nur ka hamla kaho andheron par

dayar-e-dard mein amad kaho masiha ki

rawan dawan hue khushbu ke qafile har su

khala-e-subh mein gunji sahar ki shahnai

ye ek kohra sa, ye dhund si jo chhai hai

is iltihab mein, is surmagin ujale mein

siwa tumhare mujhe kuchh nazar nahin ata

hayat nam hai yadon ka, talkh aur shirin

bhala kisi ne kabhi rang-o-bu ko pakra hai

shafaq ko qaid mein rakha saba ko band kiya

har ek lamha gurezan hai, jaise dushman hai

na tum milogi na main, ham bhi donon lamhe hain

wo lamhe ja ke jo wapas kabhi nahin ate!