Arooz is now on the App Store, for iPhone and iPad. Download →

All poetry

شعور نیلی رطوبتوں میں الجھ گیا ہے

Adil Mansuri (1936–2008)

شعور نیلی رطوبتوں میں الجھ گیا ہے

خلوص کی انگلیوں کے نیچے

اندھیرا لفظوں میں ڈھل گیا ہے

یہاں سب الفاظ کھوکھلے ہیں

یہ کھوکھلا پن مقدروں سے جڑا ہوا ہے

یہ کھوکھلا پن

جسے معانی کی ریت سے بھر سکے نہ کوئی

مقدروں سے جڑا ہوا ہے

اندھیرا گھوڑوں کی ہنہناہٹ سے گونجتا ہے

اندھیرا

جس میں کسی کی آنکھیں پگھل گئی ہیں

وہ ہنہناہٹ سے گونجتا ہے

خلوص کی انگلیوں کے نیچے

شعور نیلی رطوبتوں میں الجھ گیا ہے