لہو کو سرخ گلابوں میں بند رہنے دو

لہو کو سرخ گلابوں میں بند رہنے دو

شکستہ خواب کے شیشوں پہ اس کا عکس پڑے

سیاہ مٹی کے نیچے سفید بال جلے

کسی کے دانت مری انگلیاں چبا جائیں

خلا کے زینے سے پرچھائیاں اترنے لگیں

ہر ایک لمحے کے چہرے پہ دھوپ مرنے لگے

اداس وقت کے کندھے پہ ہاتھ رکھ کے چلوں

بزرگ باپ کے چہرے کی جھریاں چوموں

خموش ہیں در و دیوار کھڑکیاں چپ ہیں

گلی کے موڑ پہ رک جائے رات کا سایہ

مجھے نہ روکو مجھے میری ماں سے ملنے دو

یہ میرے بھائی یہ بہنیں یہ حاملہ بیوی

لہو کو سرخ گلابوں میں بند رہنے دو

lahu ko surkh gulabon mein band rahne do

shikasta khwab ke shishon pe us ka aks pare

siyah mitti ke niche safed bal jale

kisi ke dant miri ungliyan chaba jaen

khala ke zine se parchhaiyan utarne lagen

har ek lamhe ke chehre pe dhup marne lage

udas waqt ke kandhe pe hath rakh ke chalun

buzurg bap ke chehre ki jhiriyan chumun

khamosh hain dar-o-diwar khirkiyan chup hain

gali ke mor pe ruk jae rat ka saya

mujhe na roko mujhe meri man se milne do

ye mere bhai ye bahnen ye hamila biwi

lahu ko surkh gulabon mein band rahne do