خوں پتھر پہ سرک آیا

خوں پتھر پہ سرک آیا

گہرا نیلا رنگ ہوا میں ڈوب گیا

جل کنیا کے جسم پہ کالے سانپ کا سایہ لہرایا

دریا دریا زہر چڑھا

گیلی ریت پہ دھوپ نے اپنا نام لکھا

مٹھی میں مچھلی کا آنسو سوکھ گیا

گھوڑوں کی ٹاپوں سے کمرہ گونج اٹھا

خرگوشوں کی آنکھوں سے سورج نکلے

پھر دریا کی ناف میں کشتی ڈوب گئی

کاغذ کے صحرا میں پانی مت ڈھونڈو

اہرام کے دروازے کب کھلتے ہیں

ہینگر پہ کپڑے کی لاش لٹکتی ہے

پربت پربت ننگی روح بھٹکتی ہے

مجھ سے یہ پوچھو لوگو میں کیا ہوں

زنگ آلودہ شہر پہ تھوکنے آیا ہوں

khun patthar pe sarak aya

gahra nila rang hawa mein dub gaya

jal kanayya ke jism pe kale sanp ka saya lahraya

dariya dariya zahr charha

gili ret pe dhup ne apna nam likha

mutthi mein machhli ka ansu sukh gaya

ghoron ki tapon se kamra gunj utha

khargoshon ki ankhon se suraj nikle

phir dariya ki naf mein kashti dub gai

kaghaz ke sahra mein pani mat dhundo

ahram ke darwaze kab khulte hain

hingar pe kapre ki lash latakti hai

parbat parbat nangi ruh bhatakti hai

mujh se ye puchho logo mein kya hun

zang aluda shahr pe thukanne aya hun