عجیب لڑکی ہے وہ

عجیب لڑکی ہے وہ

کہ اس کو خدا بنایا تو وہ خفا ہے

چہار جانب

عبادتوں کا حصار کھینچا

مسافتوں کے شجر اگائے

ہراس کی وسعتوں کو میں نے

طلسم صوت و صدا سے باندھا

ہواؤں کو سمت آگہی دی

شبوں کے زخمی کبوتروں کو لہو پلایا

فلک پہ نیلاہٹیں بکھیریں

خلا میں قوس قزح کے رنگین پر اڑائے

نگاہ و دل کی فصیل پر جسم و جاں سجائے بدن اگائے

مگر وہ لڑکی

خدائی پا کر بھی مضمحل ہے

وہ خوش نہیں ہے

وہ کہہ رہی تھی

کہ تم نے مجھ کو خدا بنایا

تو کیا یہ سمجھوں

کہ کوئی مجھ سے بھی بالاتر ہے

ajib larki hai wo

ke us ko khuda banaya to wo khafa hai

chahar janib

ibadaton ka hisar khincha

masafaton ke shajar ugae

hiras ki wusaton ko main ne

tilism-e-saut-o-sada se bandha

hawaon ko samt agahi di

shabon ke zakhmi kabutron ko lahu pilaya

falak pe nilahaten bikheren

khala mein qaus-e-quzah ke rangin par urae

nigah-o-dil ki fasil par jism-o-jan sajae badan ugae

magar wo larki

khudai pa kar bhi muzmahil hai

wo khush nahin hai

wo kah rahi thi

ke tum ne mujh ko khuda banaya

to kya ye samjhun

ke koi mujh se bhi balatar hai