Arooz is now on the App Store, for iPhone and iPad. Download →

All poetry

اے محبت عجیب چیز ہے تو

Zafar Ahmad Siddiqi (1955–2020)

اے محبت عجیب چیز ہے تو

جان و دل سے سوا عزیز ہے تو

تیری بیتابیاں ہیں رشک سکوں

غیرت صد خرد ہے تیرا جنوں

تجھ سے لذت ہے اشک باری میں

تجھ سے راحت ہے آہ و زاری میں

تیرے باعث ہے غم بھی روح فزا

تیرے دم سے ہے تلخیوں میں مزا

لذت سوز و ساز ہے تجھ سے

جان و دل کا گداز ہے تجھ سے

فیض سے تیرے اشک دیدۂ تر

روکش صد ہزار لعل و گہر

دل کی نشو و نما ترے دم سے

روح کی ہے جلا ترے دم سے

درد میں تیرے ایسی لذت ہے

جس سے شرمندہ کیف عشرت ہے

تجھ سے آلام میں شکیبائی

تجھ سے احساس میں ہے رعنائی

زہر کا جام تجھ سے آب حیات

تجھ سے رنگیں جدائی کے لمحات

آگ کو تو بناتی ہے گلزار

تجھ سے آساں ہے آزمائش دار

طوق و زنجیر تیرا زیور ہیں

تیرے کانٹے گلوں سے بہتر ہیں

ہے کشش سے تری جہاں کا نظام

تجھ سے پایندہ نظم صبح و شام

تو نہ ذروں کو گر کرے باہم

گر پڑے یہ عمارت محکم

درس ایثار تو سکھاتی ہے

نفس کی سرکشی مٹاتی ہے

تو غبار ہوس کو دھوتی ہے

دل کی آلودگی کو کھوتی ہے

آگ میں تیری جو بھی جلتا ہے

بن کے پارس ہی وہ نکلتا ہے