حسن کی مصلحتوں کا ہے تقاضا دل سے

حسن کی مصلحتوں کا ہے تقاضا دل سے

کہ نکل جائے غم عشق کا سودا دل سے

ہو مگر جس کی رگ و پے میں محبت ساری

جس کے احساس پہ ہو نشۂ الفت طاری

کس طرح درد محبت سے کنارا کر لے

جسم اور روح کی فرقت کو گوارا کر لے

آہ لیکن یہ کسوٹی ہے وفاداری کی

آزمائش ہے یہی عشق و ہوس کاری کی

دیکھ اے دوست مرے جذبۂ الفت کو دیکھ

میری بے لوث وفا پاک محبت کو دیکھ

تجھ سے بھی تیرے لئے قطع نظر کرتا ہوں

ترک الفت کو نہ کرنا تھا مگر کرتا ہوں

دیدۂ شوق نہ ہوگا تری جانب نگراں

اب نہ آئے گی لبوں تک مرے فریاد و فغاں

چشم تر میں اب نہ اشکوں کی نمی آئے گی

دل کی بیتابیٔ وحشت میں کمی آئے گی

کیا مگر عشق کی فطرت بھی بدل جائے گی

آہ کیا یاد تری دل سے نکل جائے گی

husn ki maslahaton ka hai taqaza dil se

ke nikal jae gham-e-ishq ka sauda dil se

ho magar jis ki rag-o-pe mein mohabbat sari

jis ke ehsas pe ho nasha-e-ulfat tari

kis tarah dard-e-mohabbat se kinara kar le

jism aur ruh ki furqat ko gawara kar le

ah lekin ye kasauti hai wafadari ki

azmaish hai yahi ishq-o-hawas kari ki

dekh ai dost mire jazba-e-ulfat ko dekh

meri be los wafa pak mohabbat ko dekh

tujh se bhi tere liye qat-e-nazar karta hun

tark-e-ulfat ko na karna tha magar karta hun

dida-e-shauq na hoga tiri janib nigaran

ab na aegi labon tak mire fariyad-o-fughan

chashm-e-tar mein ab na ashkon ki nami aegi

dil ki betabi-e-wahshat mein kami aegi

kya magar ishq ki fitrat bhi badal jaegi

ah kya yad tiri dil se nikal jaegi