دل مایوس میں ہے تیری یاد

دل مایوس میں ہے تیری یاد

جیسے ویرانہ میں ہو گنج نہاں

جیسے مایوسیوں کی ظلمت میں

اک شعاع امید ہو لرزاں

جیسے خاموشیوں میں صحرا کی

ہو صدائے خرام جوئے رواں

جیسے عارف کے دل میں نور خدا

جیسے عاشق کے سینہ میں ارماں

جیسے بیمار کو نوید مسیح

جیسے حاتم کو مژدۂ مہماں

جیسے نازک سی ایک کشتی ہو

درمیان کشاکش طوفاں

جیسے ٹوٹے ہوئے کھنڈر میں ہوں

باقی پچھلی عمارتوں کے نشاں

ہوں چمن میں بچے ہوئے جیسے

موسم گل کے کچھ گل و ریحاں

جیسے چنگاری زیر خاکستر

جیسے اک شعلۂ تہ داماں

ہے تری یاد زندگی میری

اس کو دے کر نہ لوں میں باغ جناں

کبھی ظاہر ہے دل کی دھڑکن سے

کبھی ضبط فغاں میں ہے پنہاں

درد بن کر کبھی ہے دل میں مقیم

کبھی آنکھوں سے اشک بن کے رواں

ہوں غرض تیری یاد سے اے دوست

حشر بردوش خلد در داماں

dil-e-mayus mein hai teri yad

jaise wirana mein ho ganj-e-nihan

jaise mayusiyon ki zulmat mein

ik shua-e-umid ho larzan

jaise khamoshiyon mein sahra ki

ho sada-e-khiram ju-e-rawan

jaise arif ke dil mein nur-e-khuda

jaise ashiq ke sina mein arman

jaise bimar ko nawed-e-masih

jaise hatim ko muzhda-e-mehman

jaise nazuk si ek kashti ho

darmiyan-e-kashakash-e-tufan

jaise tute hue khandar mein hun

baqi pichhli imaraton ke nishan

hun chaman mein bachche hue jaise

mausam-e-gul ke kuchh gul-o-raihan

jaise chingari zer-e-khakistar

jaise ik shola-e-tah-e-daman

hai tiri yad zindagi meri

us ko de kar na lun main bagh-e-janan

kabhi zahir hai dil ki dharkan se

kabhi zabt-e-fughan mein hai pinhan

dard ban kar kabhi hai dil mein muqim

kabhi ankhon se ashk ban ke rawan

hun gharaz teri yad se ai dost

hashr bardosh khuld dar daman