میں تو شاعر ہوں

میں تو شاعر ہوں

بس ترے حسن کو احساس بنا رکھا ہے

ورنہ مجھ میں مرے کردار میں کیا رکھا ہے

روئے ناہید کہوں زہرہ جبیں کہہ ڈالوں

اپنے نغمات سے نظموں سے حسیں کہہ ڈالوں

بر زمیں پیکر فردوس بریں کہہ ڈالوں

حرم دل میں صنم خانہ سجا رکھا ہے

تجھ پہ خوابوں کو خیالوں کو نچھاور کر دوں

تجھے شب گیر بنا دوں سحر آور کر دوں

دوش مہتاب پہ رکھ دوں سر خاور کر دوں

آگہی میں ترا پندار چھپا رکھا ہے

تجھ کو تمثیل کی تشبیہ کی عظمت بولوں

روح کی تمکنت ادراک کی نخوت بولوں

تجھ کو افسانہ کہوں تجھ کو حقیقت بولوں

اپنی دنیا کو زمانے سے جدا رکھا ہے

تجھ پہ قربان عرب اور عجم صدقے کروں

تجھ پہ ناقوس و اذاں دیر و حرم صدقے کروں

صبر کا واسطہ اعجاز کا دم صدقے کروں

سوز اور ساز کو سینے میں دبا رکھا ہے

تجھ کو مسلک کہوں ایمان کہوں دین کہوں

دل کہوں جان کہوں ذات کی تسکین کہوں

جو دعا تیرے لیے ہو اسے آمین کہوں

فکر کو نامۂ اعمال پہ لا رکھا ہے

ورنہ مجھ میں مرے کردار میں کیا رکھا ہے

بس ترے حسن کو احساس بنا رکھا ہے

main to shayar hun

bas tire husn ko ehsas bana rakha hai

warna mujh mein mire kirdar mein kya rakha hai

ru-e-nahid kahun zohra jabin kah dalun

apne naghmat se nazmon se hasin kah dalun

bar zamin paikar-e-firdaus-e-barin kah dalun

haram-e-dil mein sanam khana saja rakha hai

tujh pe khwabon ko khayalon ko nichhawar kar dun

tujhe shab gir bana dun sahar awar kar dun

dosh-e-mahtab pe rakh dun sar-e-khawar kar dun

agahi mein tira pindar chhupa rakha hai

tujh ko tamsil ki tashbih ki azmat bolun

ruh ki tamkanat idrak ki nakhwat bolun

tujh ko afsana kahun tujh ko haqiqat bolun

apni duniya ko zamane se juda rakha hai

tujh pe qurban arab aur ajam sadqe karun

tujh pe naqus-o-azan dair-o-haram sadqe karun

sabr ka wasta ejaz ka dam sadqe karun

soz aur saz ko sine mein daba rakha hai

tujh ko maslak kahun iman kahun din kahun

dil kahun jan kahun zat ki taskin kahun

jo dua tere liye ho use amin kahun

fikr ko nama-e-aamal pe la rakha hai

warna mujh mein mire kirdar mein kya rakha hai

bas tire husn ko ehsas bana rakha hai