جو بار آور نہیں ہوتا

جو بار آور نہیں ہوتا

وہ لمحہ کیسا ہوتا ہے

جو رنگ و خوشبوؤں کے آبگینے توڑ دیتا ہے

جو یادوں کی کھلی آنکھوں کو

اپنے سرد ہاتھوں کے اثر سے موند دیتا ہے

جو دن کی روشنی میں شب کی آمیزش سے

ایسی ساعتیں تخلیق کرتا ہے

جو آسودہ ہی ہوتی ہیں نہ افسردہ ہی ہوتی ہیں

کبھی ہنستی کبھی بے طرح روتی ہیں

جو رستہ کھوجتی اور منزلوں کو بھول جاتی ہیں

جو زندہ ہیں نہ مرتی ہیں

جو ڈرتی ہیں ادائے وقت سے

رکتی نہ چلتی ہیں

فصیل بے یقینی پر رکھی

شمعوں کی صورت

آس میں بجھتی نہ جلتی ہیں

جو ایسی ساعتیں تخلیق کرتا ہے

وہ لمحہ کیسا ہوتا ہے

کسی پاداش کی تکمیل کا حصہ

کہ حرف‌‌ کاتب تقدیر ہوتا ہے

jo bar awar nahin hota

wo lamha kaisa hota hai

jo rang-o-khushbuon ke abgine tor deta hai

jo yadon ki khuli ankhon ko

apne sard hathon ke asar se mund deta hai

jo din ki raushni mein shab ki amezish se

aisi saaten takhliq karta hai

jo asuda hi hoti hain na afsurda hi hoti hain

kabhi hansti kabhi be tarah roti hain

jo rasta khojti aur manzilon ko bhul jati hain

jo zinda hain na marti hain

jo darti hain ada-e-waqt se

rukti na chalti hain

fasil-e-be yaqini par rakhi

shamon ki surat

as mein bujhti na jalti hain

jo aisi saaten takhliq karta hai

wo lamha kaisa hota hai

kisi padash ki takmil ka hissa

ke harf-e-katib-e-taqdir hota hai