ہوائیں چلتے چلتے تھک گئی ہیں

ہوائیں چلتے چلتے تھک گئی ہیں

دعاؤں میں اثر جاتا رہا ہے

فضائے حبس ہے عالم پہ چھائی

ہمارے دین و دل گروی پڑے ہیں

ہر اک سو ظالمانہ وحشتوں کا رقص جاری ہے

جدھر دیکھو وہیں انسانیت کا آئنہ ٹوٹا ہوا

بکھرا پڑا ہے

اسی کی کرچیوں میں ہی کہیں امید کی لو ٹمٹماتی ہے

اسی کا عکس ہی موہوم سا

اک روشنی کا استعارہ ہے

یہی پیغام دیتا ہے

کوئی ساعت بھی ہو پیہم نہیں رہتی

بدلتے موسموں کا نام ہے نیرنگیٔ فطرت

ہوائیں چلتے چلتے تھک گئی تھیں

ہوائیں رک کے پھر چلنے لگی ہیں

hawaen chalte chalte thak gai hain

duaon mein asar jata raha hai

faza-e-habs hai alam pe chhai

hamare din-o-dil girwi pare hain

har ik so zalimana wahshaton ka raqs jari hai

jidhar dekho wahin insaniyat ka aina tuta hua

bikhra para hai

usi ki kirchiyon mein hi kahin ummid ki lau timtimati hai

usi ka aks hi mauhum sa

ik raushni ka istiara hai

yahi paigham deta hai

koi saat bhi ho paiham nahin rahti

badalte mausamon ka nam hai nairangi-e-fitrat

hawaen chalte chalte thak gai thin

hawaen ruk ke phir chalne lagi hain