ہم کو ہے فخر اس پر ہم ہیں شریر بچے

ہم کو ہے فخر اس پر ہم ہیں شریر بچے

ماہر ہیں اپنے فن میں ہم بے نظیر بچے

پلے کو گھر میں لائیں بانہوں میں ہم جکڑ کر

موقع ملے تو کھینچیں بلی کی دم پکڑ کر

دیکھیں اگر گدھے کو داغیں اسے سلامی

اپنا جو بس چلے تو اس کی کریں غلامی

بکرے پہ بیٹھ کر ہم گلیوں میں روز گھومیں

چوں چوں کرے جو چوزہ اس کو ضرور چومیں

بستر کی سبز چادر خرگوش کو اڑھا دیں

منو کی لال ٹوپی بکرے کو ہم پہنا دیں

دادا میاں کا چشمہ آنکھوں میں ہم لگا کر

رستہ چلیں کمر کو اپنی ذرا جھکا کر

آیا نصیحتوں پر ہم کو نہ کان دینا

مرغوں کے ساتھ مل کر بھائے اذان دینا

باجی کا ہر دوپٹہ اپنا بنے عمامہ

جوکر بنیں پہن کر بھیا کا پائجامہ

صوفوں پہ خوب کودیں اودھم بہت مچائیں

مل جائے جو کنستر پھر ڈھول ہم بجائیں

گرمی کی دوپہر میں باغوں کی خاک پھانکیں

چڑیوں کے گھونسلوں میں جا جا کے روز جھانکیں

امردو ہوں جو کچے ان کو ضرور توڑیں

سب کام چھوٹ جائے یہ کام ہم نہ چھوڑیں

پانی میں رنگ گھولیں اس کا بنائیں شربت

پیڑوں پہ چڑھ کے بیٹھیں سمجھیں اسے ہی پربت

کتے کو دیکھتے ہی دوڑائیں لے کے ڈنڈا

اپنی بہادری کا لہرائیں خوب جھنڈا

یاروں کے ساتھ مل کر قوالیاں بھی گائیں

طبلہ بجائیں منہ سے اور تان بھی اڑائیں

انصاف ور ہیں جتنے وہ اس کو مانتے ہیں

دنیا کی ہر شرارت ہم خوب جانتے ہیں

ہم کو ہے فخر اس پر ہم ہیں شریر بچے

ماہر ہیں اپنے فن میں ہم بے نظیر بچے

ham ko hai fakhr us par ham hain sharir bachche

mahir hain apne fan mein ham be nazir bachche

pale ko ghar mein laen banhon mein ham jakar kar

mauqaa mile to khinchen billi ki dam pakar kar

dekhen agar gadhe ko daghen use salami

apna jo bas chale to us ki karen ghulami

bakre pe baith kar ham galiyon mein roz ghumen

chun chun kare jo chuza us ko zarur chumen

bistar ki sabz chadar khargosh ko urha den

mano ki lal topi bakre ko ham pahna den

dada miyan ka chashma ankhon mein ham laga kar

rasta chalen kamar ko apni zara jhuka kar

aya nasihaton par ham ko na kan dena

murghon ke sath mil kar bhae azan dena

baji ka har dupatta apna bane ammama

jokar banen pahan kar bhayya ka paijama

sofon pe khub kuden odham bahut machaen

mil jae jo kanastar phir dhol ham bajaen

garmi ki dopahar mein baghon ki khak phanken

chiriyon ke ghonslon mein ja ja ke roz jhanken

umraddo hun jo kachche un ko zarur toren

sab kam chhut jae ye kam ham na chhoren

pani mein rang gholen us ka banaen sharbat

peron pe charh ke baithen samjhen use hi parbat

kutte ko dekhte hi dauraen le ke danda

apni bahaduri ka lahraen khub jhanda

yaron ke sath mil kar qawwaliyan bhi gaen

tabla bajaen munh se aur tan bhi uraen

insaf war hain jitne wo us ko mante hain

duniya ki har shararat ham khub jante hain

ham ko hai fakhr us par ham hain sharir bachche

mahir hain apne fan mein ham be nazir bachche