آتا ہے یاد مجھ کو اسکول کا زمانا

آتا ہے یاد مجھ کو اسکول کا زمانا

وہ دوستوں کی صحبت وہ قہقہے لگانا

انور عزیز راجو منو کے ساتھ مل کر

وہ تالیاں بجانا بندر کو منہ چڑانا

رو رو کے مانگنا وہ امی سے روز پیسے

جا جا کے ہوٹلوں میں برفی ملائی کھانا

پڑھنے کو جب بھی گھر پر کہتے تھے میرے بھائی

کرتا تھا درد سر کا اکثر ہی میں بہانا

ملتی نہیں تھی فرصت دن رات کھیلنے سے

یوں رائیگاں ہوا تھا پڑھنے کا وہ زمانا

کیسے کہوں کسی سے اب کیا ہے حال میرا

کھانے کو مشکلوں سے ملتا ہے ایک دانا

ہر اک قدم پہ لگتی ہے ٹھوکروں پہ ٹھوکر

جا کر رہوں کہاں پر ملتا نہیں ٹھکانا

افسر بنے ہیں اس دم میرے ہی ہم جماعت

ان سے حیا کے مارے پڑتا ہے منہ چھپانا

بچو نہ تم سمجھنا ہرگز اسے کہانی

یہ ہے تمہارے حق میں عبرت کا تازیانہ

ہوگا بھلا تمہارا سن لو ظفرؔ کی باتیں

کھیلو ضرور لیکن پڑھنے میں دل لگانا

ata hai yad mujh ko iskul ka zamana

wo doston ki sohbat wo qahqahe lagana

anwar aziz rajo mannu ke sath mil kar

wo taliyan bajana bandar ko munh chirana

ro ro ke mangna wo ammi se roz paise

ja ja ke hotulon mein barfi milai khana

parhne ko jab bhi ghar par kahte the mere bhai

karta tha dard-e-sar ka aksar hi mein bahana

milti nahin thi fursat din rat khelne se

yun raigan hua tha parhne ka wo zamana

kaise kahun kisi se ab kya hai hal mera

khane ko mushkilon se milta hai ek dana

har ik qadam pe lagti hai thokaron pe thokar

ja kar rahun kahan par milta nahin thikana

afsar bane hain is dam mere hi ham jamaat

un se haya ke mare parta hai munh chhupana

bachcho na tum samajhna hargiz use kahani

ye hai tumhare haq mein ibrat ka taziyana

hoga bhala tumhara sun lo zafar ki baten

khelo zarur lekin parhne mein dil lagana