سیاہ رات کا بادل سروں سے چھٹتے ہی

سیاہ رات کا بادل سروں سے چھٹتے ہی

مرے دریچے کے ننگے سفید شیشے پر

نئے یقین کے سورج نے اپنی دستک دی

ادھورے خواب مرے ٹوٹ کے بکھر سے گئے

کہ جن کے ریزوں کو بے نور جگنوؤں کی طرح

گزرتے لمحوں پروں پر اڑائے پھرتے ہیں

فضا میں چاروں طرف کرچیاں سی یادوں کی

روپہلی دھوپ میں جھلکا رہی ہیں آئینے

نظر میں سارے مناظر کے انگ جھوٹے ہیں

مرے خیال کی جانے گرفت کس پر ہے

ستارہ رنگ ہیں ذرات چاند سی ہے زمیں

لہو ہے رات کا سورج کے آبگینے ہیں

کہ جس کا آتشی دن پر چڑھا ہوا سا رنگ

سنہرا جال ہے زرتار روشنی کا جال

عذاب جاں کی طرح ارد گرد پھیلا ہوا

جسے کہ رنگوں کی آوارہ سرمئی تتلی

پروں میں شام کو الجھا کے اڑنے والی ہے

میں سوچتا ہوں حسین انگلیوں سے خوابوں کی

چمکتے جگنو نہ پکڑوں نگاہ میں رکھ کر

تمام رات فضاؤں میں اس کو اڑنے دوں

siyah rat ka badal saron se chhutte hi

mire dariche ke nange safed shishe par

nae yaqin ke suraj ne apni dastak di

adhure khwab mire tut ke bikhar se gae

ke jin ke rezon ko be nur jugnuon ki tarah

guzarte lamhon paron par urae phirte hain

faza mein charon taraf kirchiyan si yadon ki

rupehli dhup mein jhalka rahi hain aine

nazar mein sare manazir ke ang jhute hain

mire khayal ki jane giraft kis par hai

sitara rang hain zarrat chand si hai zamin

lahu hai rat ka suraj ke abgine hain

ke jis ka atishi din par charha hua sa rang

sunahra jal hai zartar raushni ka jal

azab-e-jan ki tarah urad gard phaila hua

jise ke rangon ki awara surmai titli

paron mein sham ko uljha ke urne wali hai

main sochta hun hasin ungliyon se khwabon ki

chamakte jugnu na pakrun nigah mein rakh kar

tamam rat fazaon mein us ko urne dun