ہم شوریدہ کڑوے تلخ کسیلے ذائقے

ہم شوریدہ کڑوے تلخ کسیلے ذائقے

رات کی پر شہوت آنکھوں سے ٹپکے تازہ قطرے

شام کے کالے سیاہ ماتھے کی ننگی مخروطی خارش

دوپہروں کے جلتے گوشت کی تیز بساند

رات کی کالی ران سے بہتا اندھا لاوا

خلیج کی گہرائی سے باہر آتا

قدم قدم پر خوف تباہی دہشت پیدا کرتا

بکھر رہا ہے

راتوں کی سیال ملامت اپنی لمبی زلف بکھیرے

کڑوے موسم کے جشنوں میں ناچ رہی ہے

کڑوے تلخ کسیلے ذائقوں کے ان جشنوں میں

گردن تک میں پگھل گیا ہوں

ماتھے پر ان شوریدہ جشنوں کی مہریں ثبت ہوئی ہیں

کڑوے ذائقے جونکیں بن کر تالو سے اب چمٹ گئے ہیں

تیز اور تند تیزابی سورج

ہانپتے اور کراہتے سرد مکانوں کی متورم چیخیں

متورم سانسوں میں سرخ تشدد کی چیخیں

میرے کان میں سرخ تشدد کی چیخوں کی

چھاؤنیاں آباد ہوئی ہیں

ہم شوریدہ کڑوے تلخ کسیلے ذائقے

نوزائدہ شہروں کے منہ پہ

قطرہ قطرہ ٹپک رہے ہیں

ham shorida karwe talkh kasele zaiqe

rat ki par shahwat ankhon se tapke taza qatre

sham ke kale siyah mathe ki nangi makhruti kharish

dopaharon ke jalte gosht ki tez bisand

rat ki kali ran se bahta andha lawa

khalij ki gahrai se bahar ata

qadam qadam par khauf tabahi dahshat paida karta

bikhar raha hai

raton ki sayyal malamat apni lambi zulf bikhere

karwe mausam ke jashnon mein nach rahi hai

karwe talkh kasele zaiqon ke in jashnon mein

gardan tak main pighal gaya hun

mathe par un shorida jashnon ki mehren sabt hui hain

karwe zaiqe jonken ban kar talu se ab chimat gae hain

tez aur tund tezabi suraj

hanpte aur karahatte sard makanon ki mutawarrim chikhen

mutawarrim sanson mein surkh tashaddud ki chikhen

mere kan mein surkh tashaddud ki chikhon ki

chhaoniyan abad hui hain

ham shorida karwe talkh kasele zaiqe

nauzaida shahron ke munh pe

qatra qatra tapak rahe hain