زوال کے آسمانوں میں لڑکھڑاتے

زوال کے آسمانوں میں لڑکھڑاتے

اندھیرے خلاؤں کی دنیاؤں میں معلق ہوتے

اندھیرے شہروں کے برجوں کی گمنام فصیلوں پر گرتے

تشدد سے آباد انسانی بستیوں کے چہروں سے لپٹتے

اور انسانی وجود کی دھجیاں دیکھ کر چیختے روتے

کتنے ہزار سال بیت گئے ہیں

کتنے ہزار سالوں سے زوال کی چیخوں کو سنتے سنتے

ساعتیں تھک گئی ہیں

ساعتیں از بس تھک گئی ہیں

جلی ہوئی اشتہاؤں کی قوسیں

زائچوں کے حروف دیکھتے دیکھتے دم توڑ چکی ہیں

خواہشوں کے بے پایاں ہجوم

حسرتوں کی سرخ محرابوں کے نیچے

صدیوں کی دبیز گرد کے اندر دھنستے چلے گئے ہیں

خاکستری ایام کی متورم دھول میں

بے انت متلاہٹوں کے وار سہتے سہتے

سب کچھ مدفون ہو گیا ہے

مگر اب یہ زوال کی آخری چیخ ہے

ساحلوں پر پرندوں کے نئے قافلوں کا شور ہے

اور بادبانوں پہ سرخ رنگوں کی پھڑپھڑاہٹ

گم گشتہ شہروں کی بے آباد فصیلوں کے برجوں پر

ہم زوال کی آخری ساعتوں کی

آخری ہچکیاں سن رہے ہیں

zawal ke asmanon mein larkharate

andhere khalaon ki duniyaon mein muallaq hote

andhere shahron ke burjon ki gumnam fasilon par girte

tashaddud se abad insani bastiyon ke chehron se lipatte

aur insani wajud ki dhajjiyan dekh kar chikhte rote

kitne hazar sal bit gae hain

kitne hazar salon se zawal ki chikhon ko sunte sunte

saaten thak gai hain

saaten az bas thak gai hain

jali hui ishtihaon ki qausen

zaichon ke huruf dekhte dekhte dam tor chuki hain

khwahishon ke be payan hujum

hasraton ki surkh mehrabon ke niche

sadiyon ki dabiz gard ke andar dhanste chale gae hain

khakistari ayyam ki mutawarrim dhul mein

be ant matlahton ke war sahte sahte

sab kuchh madfon ho gaya hai

magar ab ye zawal ki akhiri chikh hai

sahilon par parindon ke nae qafilon ka shor hai

aur badbanon pe surkh rangon ki pharpharahat

gum gashta shahron ki be abad fasilon ke burjon par

ham zawal ki akhiri saaton ki

akhiri hichkiyan sun rahe hain