Arooz is now on the App Store, for iPhone and iPad. Download →

All poetry

اگر مجھ سے ملنا ہے آؤ ملو تم

Tabassum Kashmiri (b. 1940)

اگر مجھ سے ملنا ہے آؤ ملو تم

مگر یاد رکھنا

میں اقرار کی منزلیں راستے ہی میں چھوڑ آیا ہوں

اب مجھ سے ملنا ہے تم کو تو انکار کی سرحدوں پہ ملو

جھینگروں مکڑیوں کے جنازے

میں رستے پہ چھوڑ آیا ہوں

پرانی کتھائیں مجھے کھینچتی ہیں

زمیں کا زوال آج زنجیر پا بن رہا ہے

خس و خاک کے سارے رشتے

میں نے ہر شے کو اب تج دیا ہے

کوئی معذرت بھی نہیں ہے

کہ میں معذرت کے سبھی جھوٹے لفظوں کو

اپنی لغت سے نکال آیا ہوں

میں انکار کے آسمانوں پہ پھرتا ہوا

میں انکار کا ورد کرتا ہوا

میں زمینوں پہ اور آسمانوں کی ہر شے پہ

انکار کی سرخ مہریں لگاتا ہوا

اور دما دم کی اک تھاپ پہ

میں نے ساتوں زمینوں کے ساتوں طبق آج روشن کیے ہیں

دیکھنا آسماں رقص کرنے لگا ہے

زمینوں کے سارے خزانے ابلنے لگے ہیں

سارے دفینے جڑوں سے اکھڑ کر

مرے سامنے ہاتھ باندھے کھڑے ہیں

میری آواز پر مچھلیاں پانیوں سے نکل آئی ہیں

آج ارض و سماوات کی ساری پوشیدہ خبریں میں سننے لگا ہوں

میں خوش ہوں مجھے آگہی مل گئی ہے

بدن کے مساموں سے اب آگہی شعلہ بن کر چمکنے لگی ہے

عجب کشف کی روشنی ہے

زمیں اپنی سطح سے پاتال تک روشنی میں نہا کر

شب اولیں کی دلہن کی طرح آج شرما رہی ہے

تازہ ہواؤں کی دوشیزگی سات رنگوں میں برہنہ ہوئی ہے

حیاؤں کی سرخی سے چہرہ کنول ہے

کہ میری دلہن کا بدن پھول ہے

وہ ہواؤں کے رنگوں میں ڈوبی ہوئی ہے

ہواؤں کی دوشیزگی سات رنگوں میں برہنہ ہوئی ہے

ہر اک شے نقاب اپنا الٹے ہوئے ہے

سبھی بھید اپنی زبانیں نکالے مرے سامنے آ گئے ہیں

کتابوں کے اوراق خود بولتے ہیں

زمیں آسماں کی ہر اک شے

سمندر ہوائیں زمینوں کی سطحیں

سطحوں کے نیچے صدیوں کے چہرے

پہاڑوں کی برفیں برفوں کے شوریدہ پانی

صدیوں کے پیاسے سمندر کے ساحل درختوں کے پتے

پھولوں کے چہرے اور روز و شب کے سفید و سیاہ سلسلے

ہر اک شے مجھے اپنے بھیدوں سے اسرار سے

آشنا کر رہی ہے

عجب آشنائی کی لذت ملی ہے

میں اس آشنائی کی لذت سے سرشار ہو کر

مقدس زمیں کے پرانے دکھوں کو گلے سے لگا کر

میں اقرار کی منزلیں راستے ہی میں چھوڑ آیا ہوں

میں ساری پرانی کتھائیں جلا کر

فقط اک دما دم کی آواز پر رقص کرتا ہوا

میں اقرار کی سرحدوں سے پرے آ گیا ہوں

اب مجھ سے ملنا ہے تم کو

تو آؤ ملو

مگر یاد رکھنا

میں اقرار کی دشمنی پر اتر آیا ہوں

اب میں انکار کی سرحدوں پہ ملوں گا