میں نے زمیں کی تپتی رگوں پہ ہاتھ دھرے ہیں

میں نے زمیں کی تپتی رگوں پہ ہاتھ دھرے ہیں

میں نے زمیں کی تپتی رگوں سے

تپتے لہو کو ابلتے دیکھا ہے

ان رستوں پہ ان گلیوں پہ

پتھر جیسی سخت ہوا کے

سرخ دھماکے دیکھے ہیں

رات کی متورم گھڑیوں میں

زرد مکانوں کے صحنوں میں

لہو کو گرتے دیکھا ہے

قطرہ قطرہ قطرہ

قطرہ قطرہ بنتے بنتے ایک سمندر

اک بے پایاں تپتا سرخ سمندر

زرد مکانوں کی رگ رگ میں

تپتا سرخ سمندر

ان گلیوں کی بوڑھی چھال پہ عفریتوں کے حملے

تپتی زمیں کے ساتویں تلوے تک لہراتی اندھی چیخیں

کتنی ہی ظالم صدیوں سے

اندھی چیخیں میرے تپتے جسم کے جلتے خلیوں

زرد مساموں کے دروں میں بھٹک رہی ہیں

چیخیں میرے جسم کی اک اک رگ میں یورش کرتی ہیں

نفرت کا تیکھا لشکارہ جسم کو کاٹتا رہتا ہے

جس کے اندر جسم کے باہر

خون کا اندھا لاوا بہتا رہتا ہے

main ne zamin ki tapti ragon pe hath dhare hain

main ne zamin ki tapti ragon se

tapte lahu ko ubalte dekha hai

in raston pe un galiyon pe

patthar jaisi sakht hawa ke

surkh dhamake dekhe hain

rat ki mutawarrim ghariyon mein

zard makanon ke sehnon mein

lahu ko girte dekha hai

qatra qatra qatra

qatra qatra bante bante ek samundar

ik be payan tapta surkh samundar

zard makanon ki rag rag mein

tapta surkh samundar

un galiyon ki burhi chhal pe ifriton ke hamle

tapti zamin ke satwin talwe tak lahrati andhi chikhen

kitni hi zalim sadiyon se

andhi chikhen mere tapte jism ke jalte khalliyon

zard masamon ke darun mein bhatak rahi hain

chikhen mere jism ki ik ik rag mein yurish karti hain

nafrat ka tikha lushkara jism ko katta rahta hai

jis ke andar jism ke bahar

khun ka andha lawa bahta rahta hai