مجھے لگتا ہے

مجھے لگتا ہے

زمین کے کسی گمنام منطقے میں

ہم کبھی ساتھ ساتھ رہتے تھے

مجھے اب تمہارا نام یاد نہیں

تمہاری شکل بھی یاد نہیں

مگر یہ لگتا ہے

کہ شاید کئی صدیاں پہلے

کسی پچھلے جنم کی سیڑھیوں پر

ہم ساتھ ساتھ بیٹھتے تھے

وہ سیڑھیاں کہاں تھیں

اور پچھلا جنم کہاں ہوا تھا

مجھے تو یاد نہیں

شاید تم کو بھی یاد نہ ہوگا

ہاں بس اتنا یاد ہے

ایک چھوٹے سے گھر میں

ہم سر شام دیوتا کے لئے دیے جلاتے تھے

اور دیوں کے قریب ایک پنچھی رہتا تھا

جو بادل برکھا اور دھوپ کے گیت گاتا تھا

گیت سنتے سنتے

اور دیے بجھنے سے پہلے ہی

ہم نمدوں پر سو جاتے تھے

اور پھر ہم دونوں مل کر

ایک جیسا کوئی خواب دیکھتے تھے

بہت سے تالابوں جنگلوں

اور باغوں کا خواب

صبح دم انگنائی میں سورج اتر آتا تھا

پنچھی پیڑوں پر

اور ایک بادل چھت پر بیٹھ جاتا تھا

پھر ہم چوکھٹ پر بیٹھ کر

رنگوں کی بازگشتیں سنتے ہوئے

ایک تالاب کو دیکھتے رہتے تھے

مجھے لگتا ہے یہ ہم ہی تھے

جو تالاب کی طرف دیکھتے اور بازگشتیں سنتے تھے

ہاں شاید ہم ہی تھے

اب یہ یاد نہیں اس سمے ہمارے نام کیا تھے

mujhe lagta hai

zamin ke kisi gumnam mantaqe mein

ham kabhi sath sath rahte the

mujhe ab tumhara nam yad nahin

tumhari shakl bhi yad nahin

magar ye lagta hai

ke shayad kai sadiyan pahle

kisi pichhle janam ki sirhiyon par

ham sath sath baithte the

wo sirhiyan kahan thin

aur pichhla janam kahan hua tha

mujhe to yad nahin

shayad tum ko bhi yad na hoga

han bas itna yad hai

ek chhote se ghar mein

ham sar-e-sham dewta ke liye diye jalate the

aur diyon ke qarib ek panchhi rahta tha

jo badal barkha aur dhup ke git gata tha

git sunte sunte

aur diye bujhne se pahle hi

ham namdon par so jate the

aur phir ham donon mil kar

ek jaisa koi khwab dekhte the

bahut se talabon jangalon

aur baghon ka khwab

subh dam angnai mein suraj utar ata tha

panchhi peron par

aur ek badal chhat par baith jata tha

phir ham chaukhat par baith kar

rangon ki bazgashten sunte hue

ek talab ko dekhte rahte the

mujhe lagta hai ye ham hi the

jo talab ki taraf dekhte aur bazgashten sunte the

han shayad ham hi the

ab ye yad nahin is samay hamare nam kya the