یہ رہ گزر — Vaqar Khaleel

یہ رہ گزر

رہ گزار خوباں ہے جس کا ہر موڑ کہکشاں ہے

سجل شگفتہ حسیں دل آویز خوبصورت بہار ساماں

ادھر سے گزر گیا زمانہ کہ جیسے گزرے رمیدہ آہو

جلو میں صبحوں کی مسکراہٹ

لبوں پہ روشن سی گنگناہٹ

جبیں پہ تقدیس فن کا قشقہ

نظر نظر میں سحر کے خاکے

لچکتی باہیں مہکتے گیسو

صبیح ابرو گداز بازو

قدم قدم پر پڑے ہیں حلقے

ٹھہر ٹھہر کر بجے ہیں گھنگھرو

یہ رہ گزر رہ گزار خوباں ہے جس کا ہر موڑ کہکشاں ہے

یہ رہ گزر

ہوش مند محنت کشوں کی دانش کے شاہزادوں کی رہ گزر ہے

کہ جس کا ہر موڑ جہد و فن کی علامتوں کا نگر نگر ہے

مرے رفیقو

یہ رہ گزر اک نئی ڈگر ہے

یہ رہ گزر فہم اور بصیرت کی رہ گزر ہے

مگر ابھی زلف تا کمر ہے