مناتا موج گر چوہا میں ہوتا

مناتا موج گر چوہا میں ہوتا

سحر سے شام تک پھرتا ہی رہتا

لگے جب بھوک میں میٹھا چراتا

مزے سے بل میں بیٹھا اس کو کھاتا

محلے کے سبھی باورچی خانے

بلائیں گے مجھے دعوت اڑانے

مزے سے دعوتیں ہر گھر میں کھاتا

دہی مسکہ ملائی دودھ اڑاتا

اگر بلی چلی آئے جھپٹ کر

تو گھس جاؤں گا میں بل دبک کر

مناتا موج گر مچھلی میں ہوتا

ہمیشہ تیرتے پانی میں رہتا

مکاں ہوتا مرا پانی کے اندر

بہت اجلا بہت اچھا بڑا سندر

مزے سے گھومتا دھومیں مچاتا

کبھی میں زور سے پانی اڑاتا

کبھی میں مینڈکوں سے چھیڑ کرتا

کبھی میں بلبلے پانی پہ لاتا

شکاری گر مجھے لینے کو آتا

میں پانی کی تہوں میں ڈوب جاتا

مناتا موج گر بندر میں ہوتا

اچھلتے کودتے باغوں میں پھرتا

مزے سے جھولتا پینگیں لگاتا

کبھی میں شاخ پر ہی گنگناتا

اگر مالی مجھے آنکھیں دکھاتا

جھپٹ کر اس کی میں پگڑی اڑاتا

اچکتے پھاندتے بنگلوں میں جاتا

میں بچوں کو ستاتا منہ چڑھاتا

کتابیں ٹوپیاں بستے اڑاتا

کسی کے سر پہ پھر چانٹے جماتا

مناتا موج گر ہوتا پرندہ

زمیں سے آسماں کی سیر کرتا

کبھی نیچے سے میں اوپر کو آتا

جہاں کو شعبدے اپنے دکھاتا

مزے سے گھومتا پھرتا ہوا میں

کبھی ٹھوکر نہیں کھاتا فضا میں

درختوں پر سویرے چہچہاتا

خدا کی حمد میں ہر وقت گاتا

کوئی بچہ پکڑنے کو جو آتا

بھلا کب اس کے میں ہوں ہاتھ آتا

manata mauj gar chuha mein hota

sahar se sham tak phirta hi rahta

lage jab bhuk mein mitha churata

maze se bal mein baitha us ko khata

mohalle ke sabhi bawarchi khane

balaenge mujhe daawat urane

maze se daawaten har ghar mein khata

dahi maska milai dudh urata

agar billi chali ae jhapat kar

tu ghis jaunga mein bal dabak kar

manata mauj gar machhli mein hota

hamesha tairte pani mein rahta

makan hota mira pani ke andar

bahut ujla bahut achchha bara sundar

maze se ghumta dhumen machata

kabhi main zor se pani urata

kabhi main mendakon se chher karta

kabhi main bulbule pani pe lata

shikari gar mujhe lene ko ata

main pani ki tahon mein dub jata

manata mauj gar bandar mein hota

uchhalte kudte baghon mein phirta

maze se jhulta pingen lagata

kabhi main shakh par hi gungunata

agar mali mujhe ankhen dikhata

jhapat kar us ki main pagri urata

uchakte phandte banglon mein jata

main bachchon ko satata munh charhata

kitaben topiyan baste urata

kisi ke sar pe phir chante jamata

manata mauj gar hota parinda

zamin se asman ki sair karta

kabhi niche se main upar ko ata

jahan ko shobade apne dikhata

maze se ghumta phirta hawa mein

kabhi thokar nahin khata faza mein

darakhton par sawere chahchahata

khuda ki hamd mein har waqt gata

koi bachcha pakarne ko jo ata

bhala kab us ke main hun hath ata