صبح دم آتی ہے اے ہند ترے آنچل سے

صبح دم آتی ہے اے ہند ترے آنچل سے

حمد کی نعت کی پوجا کی بھجن کی خوشبو

دھڑکنوں نے یہاں چھیڑی ہے محبت کی غزل

ہے فضاؤں میں اخوت کے سمن کی خوشبو

تیرے دامن میں اجنتا و حسیں تاج محل

تیرے کھیتوں میں ہے دہقاں کے جتن کی خوشبو

تیرے جھرنوں سے ابھرتے ہیں ترانے دل کش

روح سرشار کرے دشت و دمن کی خوشبو

میرؔ و غالبؔ ہوں کہ اقبالؔ یا چکبستؔ و فراقؔ

تیری مٹی میں بسی ان کے سخن کی خوشبو

رنگ کی نسل کی تہذیب کی ہے قوس قزح

ہے کہاں دہر میں یہ گنگ و جمن کی خوشبو

مجھ کو غربت میں بھی احساس وطن ہوتا ہے

جب بھی لاتی ہے صبا میرے وطن کی خوشبو

تیری مٹی پہ تصدق ہیں دل و جان سبھی

بھول سکتے نہیں ہم تیرے منن کی خوشبو

تیرے ہونٹوں پہ تبسم کی دھنک کھلتی رہے

سدا آباد رہے تیرے چمن کی خوشبو

subh dam ati hai ai hind tire anchal se

hamd ki naat ki puja ki bhajan ki khushbu

dharkanon ne yahan chheri hai mohabbat ki ghazal

hai fazaon mein ukhuwwat ke saman ki khushbu

tere daman mein ajnata-o-hasin taj mahal

tere kheton mein hai dehqan ke jatan ki khushbu

tere jharnon se ubharte hain tarane dil kash

ruh sarshar kare dasht-o-daman ki khushbu

mir-o-ghalib hun ke iqbal ya chukbast-o-firaq

teri mitti mein basi un ke sukhan ki khushbu

rang ki nasl ki tahzib ki hai qaus-e-quzah

hai kahan dahr mein ye gang-o-jaman ki khushbu

mujh ko ghurbat mein bhi ehsas-e-watan hota hai

jab bhi lati hai saba mere watan ki khushbu

teri mitti pe tasadduq hain dil-o-jan sabhi

bhul sakte nahin ham tere manan ki khushbu

tere honton pe tabassum ki dhanak khulti rahe

sada abad rahe tere chaman ki khushbu