خواب کی سلطنت سے ادھر

خواب کی سلطنت سے ادھر

اک جہاں ہے جسے آنکھ آباد کر لے تو کر لے

وہاں سائے ہی سائے ہیں

اکثر و بیشتر دھوپ میں رقص کرتے ہوئے

ریز گاری کی آواز پر دھڑکنیں تال دیتی ہیں تو جھلملاتے ہیں

آنکھوں میں خواب

صبح سے شام تک

جیسے تمناؤں کو تھپکیاں دے شب ہجر میں ایک برہن کا دل

روز خوابوں کی پونجی میں سکوں کے گرنے سے اک گونج اٹھتی ہے

گویا کہیں ٹین کی چھت پہ بارش کے قطرے پڑیں

روز اک گھر تمنا کے ملبے سے آنکھوں کے پاتال میں جھانکتا ہے

وہی بے گھری بے زمینی کا دکھ آج تک مجھ کو گھیرے ہوئے ہے

میں چاند اور سورج کی صورت فلک در فلک تیرتا ہوں

مرے خواب مجھ کو اڑائے لیے جا رہے ہیں

میں پامال ہوتی ہوئی آرزو میں کہاں تک جیوں گا

khwab ki saltanat se idhar

ik jahan hai jise ankh abad kar le to kar le

wahan sae hi sae hain

aksar-o-beshtar dhup mein raqs karte hue

rez gari ki awaz par dharkanen tal deti hain to jhilmilate hain

ankhon mein khwab

subh se sham tak

jaise tamannaon ko thapakiyan de shab-e-hijr mein ek birhan ka dil

roz khwabon ki punji mein sukun ke girne se ik gunj uthti hai

goya kahin tin ki chhat pe barish ke qatre paren

roz ik ghar tamanna ke malbe se ankhon ke patal mein jhankta hai

wahi be ghiri be zamini ka dukh aj tak mujh ko ghere hue hai

main chand aur suraj ki surat falak dar falak tairta hun

mire khwab mujh ko urae liye ja rahe hain

main pamal hoti hui arzu mein kahan tak jyunga