جمال حسن کو جب بے حجاب دیکھیں گے

جمال حسن کو جب بے حجاب دیکھیں گے

نگاہ شوق ترا انتخاب دیکھیں گے

مجال دید نہ ذوق نظر ملی جن کو

تجلیات کو وہ بے نقاب دیکھیں گے

ملے گی ان کو یقیناً سکون کی دولت

بغور جب بھی خدا کی کتاب دیکھیں گے

ہمارا شوق سفر منزلوں کو چھو لے گا

پھر اپنے آپ کو ہم کامیاب دیکھیں گے

ہر ایک لمحہ اسی آس میں گزرتا ہے

کبھی تو باب رسالت مآب دیکھیں گے

نہ دردؔ ہوگا نہ کچھ درد میں کسک باقی

جب ان کا لطف و کرم بے حساب دیکھیں گے

jamal-e-husn ko jab be hijab dekhenge

nigah-e-shauq tira intikhab dekhenge

majal-e-did na zauq-e-nazar mili jin ko

tajliyat ko wo be naqab dekhenge

milegi un ko yaqinan sukun ki daulat

baghaur jab bhi khuda ki kitab dekhenge

hamara shauq safar manzilon ko chhu lega

phir apne ap ko ham kamyab dekhenge

har ek lamha isi as mein guzarta hai

kabhi to bab-e-risalat mab dekhenge

na dard hoga na kuchh dard mein kasak baqi

jab un ka lutf-o-karam be hisab dekhenge