نار و نمرود کا وہ قصہ تو پارینہ ہے

نار و نمرود کا وہ قصہ تو پارینہ ہے

کیا کہا

مصر و کنعان کے تعلق کی کہانی چھیڑوں

مصر و کنعان میں کیا رکھا ہے

نیل کی لہروں کے ہم راہ چلے تھے موسیٰ

کرنے غرقاب اسی نیل میں کس کو آخر

اور شداد

وہ جنت کیسی

کس کے کیا خواب تھے کیا مکر تھے کیا حیلے تھے

آؤ سب دفن کریں

کہنہ اوراق میں کیا رکھا ہے

لاؤ البم وہ ذرا

دیکھیں تصویر نئی

خوشبو و رنگ و دھنک بادل کی

ہاں وہی قریہ جو تہذیب کا گہوارہ تھا

دیکھ کر جس کا فسوں

راستہ واپسی کا کتنے مسافر بھولے

تم کو معلوم نہیں ہے شاید

اف یہ تصویر سیہ

یہ سیہ روح جو تاریک گپھاؤں میں رہا کرتی تھی

پنجۂ خونیں نے اس کے آخر

خطۂ ارض مقدس کو لہو ریز کیا

کیا امیران عجم کیسے فقیہان حرم

سب کے سب اس کی ہتھیلی میں ہیں بند

دیکھ اعجاز بیانی اس کی

منہ چھپائے ہوئے

شہر بابل کا سحر پھرتا ہے

پتھروں کو کیا روشن مشعل

اور شجر ٹہنی کو اڑتا طائر

اس عجب دھند عجب سحر میں مدہوش تھے سب

کہ یکایک گری تصویر اک اور البم سے

دیکھتے کیا ہیں کہ اس خطے کے اک گوشے سے

وارث شہر گراں خواب اٹھے

قلبہ رانی نے جنہیں عزم مصمم بخشا

جسم میں ٹھونکی ہوئی کیلیں سبھی

نوچ کر پھینک ہی دیں

ہوش آتے ہی چلے قصر مقدس کی طرف

اور سیہ روح وہ تاریک گپھا

جس نے اس قصر مقدس کو کیا تھا مسموم

ناطقہ سر بہ گریباں اس کا

ساحری شعلہ بیانی و اداکاری سبھی گنگ

nar-o-namrud ka wo qissa to parina hai

kya kaha

misr-o-kanan ke taalluq ki kahani chherun

misr-o-kanan mein kya rakha hai

nil ki lahron ke ham rah chale the musa

karne gharqab isi nil mein kis ko akhir

aur shaddad

wo jannat kaisi

kis ke kya khwab the kya makr the kya hile the

ao sab dafn karen

kohna auraq mein kya rakha hai

lao albam wo zara

dekhen taswir nai

khushbu-o-rang-o-dhanak badal ki

han wahi qarya jo tahzib ka gahwara tha

dekh kar jis ka fusun

rasta wapsi ka kitne musafir bhule

tum ko maalum nahin hai shayad

uf ye taswir siyah

ye siyah ruh jo tarik guphaon mein raha karti thi

panja-e-khunin ne us ke akhir

khitta-e-arz-e-muqaddas ko lahu rez kya

kya amiran-e-ajam kaise faqihan-e-haram

sab ke sab us ki hatheli mein hain band

dekh ejaz bayani us ki

munh chhupae hue

shahr babil ka sahar phirta hai

pattharon ko kya raushan mashal

aur shajar tahni ko urta tair

is ajab dhund ajab sahar mein madhosh the sab

ke yakayak giri taswir ik aur albam se

dekhte kya hain ke is khitte ke ik goshe se

waris shahr-e-giran khwab uthe

qulba rani ne jinhen azm-e-musammam bakhsha

jism mein thonki hui kilen sabhi

noch kar phenk hi den

hosh ate hi chale qasr-e-muqaddas ki taraf

aur siyah ruh wo tarik gupha

jis ne is qasr-e-muqaddas ko kya tha masmum

natiqa sar ba gareban us ka

sahiri shola bayani-o-adakari sabhi gang