دنیا کے بکھیڑوں سے الجھتے ہوئے کل اچانک

میری نظر پڑی تو دیکھا کہ

زندگی کی ہتھیلی سے ساری لکیریں غائب ہو گئی ہیں

سوائے ایک لکیر کے

نہ چھوٹی لکیریں نہ بڑی

نہ مدھم نہ گہری

نہ مدور اور نہ مستقیم

نہ دونوں ہتھیلیوں کو جوڑ کر بنتا کوئی چاند

نہ ان لکیروں کی اوٹ سے جھانکتا کسی سوہنی کا چہرہ

اور نہ ہی ان میں الجھتا کسی مہیوال کا دل

یہ کیسی ہتھیلی ہے

بالکل سپاٹ

بے رنگ

تتلیوں کا کوئی رنگ نہیں ان پہ

اور یک لخت

اور زندگی

زندگی کے اداس چہرے پہ میں نے املتاس کی زردی اترتے دیکھی

ناکردہ جرم کے بوجھ تلے سر جھکائے نظریں چراتی ہوئی

دبے پاؤں کھسکنے کی تیاری کرتی ہوئی

اس کی آنکھوں کی چمک لمحہ بہ لمحہ پھیکی پڑتی جا رہی تھی

اور تب میں نے ساری قوتیں جمع کر کے بلیک مارکر اٹھایا