سوزش غم کا بیاں لب پہ نہ لاؤں کیونکر

سوزش غم کا بیاں لب پہ نہ لاؤں کیونکر

درد ہے حد سے سوا دل میں چھپاؤں کیونکر

تو یہیں دوست مرے غم کا مداوا کر دے

چوٹ جو دل پہ لگی ہے وہ دکھاؤں کیونکر

کیسے دہراؤں غم زیست کے افسانے کو

سننے والا نہ کوئی ہو تو سناؤں کیونکر

روشنی ہوتی نہیں میرے سیہ خانے میں

شمع دل اب شب ہجراں میں جلاؤں کیونکر

سلک انجم ہیں تری یاد میں آنسو اب تک

تیرے دامن کو ستاروں سے سجاؤں کیونکر

جب کے تنکے کا سہارا بھی نہیں ہے ناشادؔ

اپنی کشتی کو تلاطم سے بچاؤں کیونکر

sozish-e-gham ka bayan lab pe na laun kyunkar

dard hai had se siwa dil mein chhupaun kyunkar

tu yahin dost mire gham ka mudawa kar de

chot jo dil pe lagi hai wo dikhaun kyunkar

kaise dohraun gham-e-zist ke afsane ko

sunne wala na koi ho to sunaun kyunkar

raushni hoti nahin mere siyah khane mein

sham-e-dil ab shab-e-hijran mein jalaun kyunkar

silk-e-anjum hain tiri yad mein ansu ab tak

tere daman ko sitaron se sajaun kyunkar

jab ke tinke ka sahara bhi nahin hai nashad

apni kashti ko talatum se bachaun kyunkar