ہم غبار رہ گزر

ہم غبار رہ گزر

ہے یہ قصہ مختصر

سن زمیں کی سسکیاں

آسماں نیچے اتر

ایک اکیلی جان ہے

چار سمتوں میں بھنور

سو دکانیں کھل گئیں

اک خدا کے نام پر

آدمی خوش ہے بہت

آدمی کو مار کر

زندگی کا لطف لے

امتحانوں سے گزر

ذہن کی بیداریاں

اک مسلسل درد سر

آئے گی افتاد بھی

ایک دن افتاد پر

غیر سے رشتے بنا

صحن میں دیوار کر

واقعی ناراض ہوں

راستہ ہموار کر

مطمئن سے ہو گئے

آئنے کو توڑ کر

آفتیں ٹوٹیں بہت

اس دل نادار پر

لگ کبھی سینے سے لگ

کر کبھی حیران کر

آخرش جی ہی لئے

اپنے جی کو مار کر

اے خدا میرے خدا

راستہ آسان کر

ham ghubar-e-rah guzar

hai ye qissa mukhtasar

sun zamin ki siskiyan

asman niche utar

ek akeli jan hai

char samton mein bhanwar

so dukanen khul gain

ik khuda ke nam par

admi khush hai bahut

admi ko mar kar

zindagi ka lutf le

imtihanon se guzar

zehn ki bedariyan

ik musalsal dard-e-sar

aegi uftad bhi

ek din uftad par

ghair se rishte bana

sehn mein diwar kar

waqai naraz hun

rasta hamwar kar

mutmain se ho gae

aine ko tor kar

afaten tuten bahut

is dil-e-nadar par

lag kabhi sine se lag

kar kabhi hairan kar

akhirash ji hi liye

apne ji ko mar kar

ai khuda mere khuda

rasta asan kar