اٹھو قدم قدم سے ملاتے چلے چلو

اٹھو قدم قدم سے ملاتے چلے چلو

سب مل کے ایک راہ بناتے چلے چلو

منزل کی دھن میں جھومتے گاتے چلے چلو

ہر مرحلے کو سہل بناتے چلے چلو

بن کر گھٹا فضاؤں پہ چھاتے چلے چلو

ہر ہر قدم پہ دھوم مچاتے چلے چلو

تفریق رنگ و نسل مٹاتے چلے چلو

انسانیت کی شان دکھاتے چلے چلو

آگے بڑھو رکو نہ کسی رہ گزار پر

ہر دم سفر کا لطف اٹھاتے چلے چلو

مایوسیوں میں چھیڑ دو نغمے امید کے

تاریکیوں میں جوت جگاتے چلے چلو

ٹوٹے ہوئے دلوں کو محبت سے جوڑ دو

جوہر عمل کے اپنے دکھاتے چلے چلو

دھرتی بھی جگمگا اٹھے آکاس کی طرح

راتوں میں وہ چراغ جلاتے چلے چلو

چمکو گگن کے تاروں کی صورت زمین پر

تم آسماں زمیں کو بناتے چلے چلو

پت جھڑ کی رت میں پھول کھلانا کمال ہے

پت جھڑ کی رت میں پھول کھلاتے چلے چلو

بدلے خزاں نظیرؔ چمن میں بہار سے

وہ گیت زندگی کے سناتے چلے چلو

utho qadam qadam se milate chale chalo

sab mil ke ek rah banate chale chalo

manzil ki dhun mein jhumte gate chale chalo

har marhale ko sahl banate chale chalo

ban kar ghata fazaon pe chhate chale chalo

har har qadam pe dhum machate chale chalo

tafriq rang-o-nasl mitate chale chalo

insaniyat ki shan dikhate chale chalo

age barho ruko na kisi rah guzar par

har dam safar ka lutf uthate chale chalo

mayusiyon mein chher do naghme umid ke

tarikiyon mein jot jagate chale chalo

tute hue dilon ko mohabbat se jor do

jauhar amal ke apne dikhate chale chalo

dharti bhi jagmaga uthe akas ki tarah

raton mein wo charagh jalate chale chalo

chamko gagan ke taron ki surat zamin par

tum asman zamin ko banate chale chalo

pat jhar ki rut mein phul khilana kamal hai

pat jhar ki rut mein phul khilate chale chalo

badle khizan nazir chaman mein bahar se

wo git zindagi ke sunate chale chalo