مرے ساتھ سانسوں کی صورت

مرے ساتھ سانسوں کی صورت

وہ تاریخ کے سارے اوراق میں جاگتا ہے

کثافت زدہ ناخنوں کی سرنجوں میں بل کھاتے بچھو بھرے

مرے پھیپھڑوں کی توانائیوں میں

مصائب سے سمجھوتہ کرنے

حقیقت کہ پتلیوں کا تماشا سمجھنے کا سرطان داخل کرے

مجھے زندہ رہنے کے ایسے قرینے سکھاتا ہے

جن کے سرابوں میں اپنی حفاظت کی زنجیر پہنے

مرے پاؤں رقصاں رہے

کشت در کشت بحراں رہے

ٹھوکروں میں گلستاں رہے

بے نوا کشتیوں پہ بپھرتے سمندر میں

چکلوں کے نیلام خانوں میں

بد بخت مجنوں پہ بھاری صداقت کے صحرا میں

آتش فشاں نخل ہائے تمنا تلے

گول میزوں پہ ٹوٹے ہوئے آئنوں میں

کہ سندر بتوں کی شفق شاموں میں

ہر سو

ہواؤں کی مانند موجود آفت

مری انگلیاں

آگ اور خون کی ریشمی چھتریاں کھولتی ہیں

مقابر کی بے گوش تاریکیوں میں

مہالک کی پگلی ہواؤں میں

کیفوں میں گھٹیا تمباکو کی مانند سلگے ہجوموں میں

محکوم پگڈنڈیوں اور محصور سڑکوں پہ کچلے سروں کے تعفن میں

ویراں دفاتر کی بوسیدہ میزوں پہ آراستہ

سرخ جونکوں کی دہشت میں

سبز گولے اگلتے

سیہ آہنی اژدہوں کے ہزیمت زدہ شور میں

منہمک جبر کے

اپنے ہاتھوں میں فولادی درے لیے

محافظ مرا جاگتا ہے

خود اپنے پپوٹوں میں خاشاک ہوتے

تدبر کے غرے لیے

محافظ مرا جاگتا ہے

mire sath sanson ki surat

wo tarikh ke sare auraq mein jagta hai

kasafat zada nakhunon ki sarinjon mein bal khate bichho bhare

mire phephron ki tawanaiyon mein

masaib se samjhotah karne

haqiqat ke putliyon ka tamasha samajhne ka sartan dakhil kare

mujhe zinda rahne ke aise qarine sikhata hai

jin ke sarabon main apni hifazat ki zanjir pahne

mire paon raqsan rahe

kisht-e-dar kisht-e-bohran rahe

thokaron mein gulistan rahe

be nawa kashtiyon pe bipharte samundar mein

chaklon ke nilam khanon mein

bad bakht majnun pe bhari sadaqat ke sahra mein

atish fishan nakhl ha-e-tamanna tale

gol mezon pe tute hue ainon mein

ke sundar buton ki shafaq shamon mein

har su

hawaon ki manind maujud afat

miri ungliyan

ag aur khun ki reshmi chhatriyan kholti hain

maqabir ki be gosh tarikiyon mein

mahalik ki pigli hawaon mein

kaifon mein ghatiya tambaku ki manind sulge hujumon mein

mahkum paggdandiyon aur mahsur sarkon pe kuchle saron ke taaffun mein

wiran dafatir ki bosida mezon pe arasta

surkh jonkon ki dahshat mein

sabz gole ugalte

siyah ahani azhdahon ke hazemat zada shor mein

munhamik jabr ke

apne hathon mein fauladi darre liye

muhafiz mira jagta hai

khud apne papoton mein khashak hote

tadabbur ke gharre liye

muhafiz mira jagta hai