ہم نشیں جس کو سمجھتا تھا ستم گر نکلا

ہم نشیں جس کو سمجھتا تھا ستم گر نکلا

آستیں میں وہ چھپائے ہوئے خنجر نکلا

یہ بھی اچھا ہوا برسوں کا بھرم ٹوٹ گیا

ہیرا سمجھا تھا جسے ہائے وہ پتھر نکلا

تو تو کہتا تھا ترے پیار میں رکھا کیا ہے

دل جو چیرا تو محبت کا سمندر نکلا

میں تو سمجھا تھا نہیں ہے کوئی ارماں باقی

دل میں جھانکا تو تمناؤں کا لشکر نکلا

کیوں کسی اور پہ الزام لگاؤں بے جا

دل مرا توڑنے والا مرا دلبر نکلا

یک بیک ہونے لگے زخم ہرے سینے کے

درد آنکھوں سے مرے دل کا سمٹ کر نکلا