ابھی کچھ اور سانسیں رہ گئی ہیں

ابھی کچھ اور سانسیں رہ گئی ہیں

ابھی کچھ اور رسالوں تک مجھے گننا ہے ان کو

ابھی کچھ قرض ہے مجھ پر سبھی کا

ابھی کچھ اور خوشیاں بانٹنی ہیں

ابھی کچھ قہقہوں کو نغمگی خیرات کرنی ہے

گہر کرنا ہے لفظوں کو

زمین حرف و معنی سے ابھی کچھ خار چننے ہیں

خیالوں کو دھنک بننا ہے شاید

نئے خوابوں کو صورت بخشنی ہے

ابھی ذروں کو وسعت بخشنی ہے

ہرے موسم سے خوشبو کسب کرنی ہے

لہو دینا ہے سارے زرد پتوں اور پھولوں کو

ہواؤں کو سبک گامی سکھانی ہے

اندھیروں کو ستاروں کو ابھی مشعل دکھانی ہے

ابھی بادل کو بارش دان دینی ہے

چمکتے چاند کو ویران ماتھے پر سجانا ہے

کہیں مہندی کا بوٹا اور کہیں پر نیم اگانا ہے

مرے اللہ سمجھ میں آ گیا میرے

ابھی کچھ اور دن جینا ہے مجھ کو

ابھی دنیا کو ہے میری ضرورت

abhi kuchh aur sansen rah gai hain

abhi kuchh aur risalon tak mujhe ginna hai un ko

abhi kuchh qarz hai mujh par sabhi ka

abhi kuchh aur khushiyan bantni hain

abhi kuchh qahqahon ko naghmagi khairat karni hai

guhar karna hai lafzon ko

zamin-e-harf-o-maani se abhi kuchh khar chunne hain

khayalon ko dhanak banna hai shayad

nae khwabon ko surat bakhshni hai

abhi zarron ko wusat bakhshni hai

hare mausam se khushbu kasb karni hai

lahu dena hai sare zard patton aur phulon ko

hawaon ko subuk gami sikhani hai

andheron ko sitaron ko abhi mashal dikhani hai

abhi badal ko barish dan deni hai

chamakte chand ko wiran mathe par sajana hai

kahin mehndi ka buta aur kahin par nim ugana hai

mire allah samajh mein a gaya mere

abhi kuchh aur din jina hai mujh ko

abhi duniya ko hai meri zarurat