Arooz is now on the App Store, for iPhone and iPad. Download →

All poetry

زندگی سمٹتی ہے

Rafia Shabnam Abidi (b. 1943)

زندگی سمٹتی ہے

دائروں کے اندر ہی

کتنی بار بٹتی ہے

دائروں کے اندر ہی

دائرے سے ہوتے ہیں

کچھ خطوط ملتے ہیں

کچھ خطوط کٹتے ہیں

زاویے بدلتے ہی

زاویے بدلتے ہی

کتنی شکلیں مٹتی ہیں

کتنی شکلیں بنتی ہیں

دائروں کے اندر ہی

ہم بھی سانس لیتے ہیں

زاویوں میں جیتے ہیں

قاعدوں میں ہنستے ہیں

پھیلتے ہیں شکلوں میں

اور خطوط بنتے ہیں

جب خطوط کٹتے ہیں

قوس قوس کی صورت

ہم بھی پھر سمٹتے ہیں

ہم کہ ایک نقطہ ہیں

دائروں کے اندر ہی

گھٹتے بڑھتے رہتے ہیں

زندگی سمٹتی ہے

دائروں کے اندر ہی

کتنی بار بٹتی ہے