تم مرے پاس رہو ساتھ رہو

تم مرے پاس رہو ساتھ رہو

اور یہ احساس رہے

میں کہ آزاد ہوں جینے کے لئے

اور زندہ ہوں خود اپنے اندر

اپنی ہی ذات میں تابندہ ہوں

اپنی ہر سانس پہ قبضہ ہے مرا

اپنی پاکیزہ تمناؤں کی تکمیل کا حق ہے مجھ کو

اپنے معصوم سے جذبات کی ترسیل کا حق ہے مجھ کو

یہ زمیں میری بھی یہ دشت و چمن میرے بھی

صرف آنگن ہی نہیں کوہ و دمن میرے بھی

ماہ و انجم بھی مرے نیلا طبق میرا بھی

جتنا ان پر ہے تمہارا وہی حق میرا بھی

شرط بس یہ ہے

کہ تم ساتھ رہو پاس رہو

میری ہر مرضی میں شامل ہو تمہاری مرضی

میری ہر سانس کی شاہد ہوں تمہاری سانسیں

میرے ہر راز کی حاصل ہو تمہاری دھڑکن

اور ہم ایک ہی زنجیر میں پابستہ ہوں

tum mire pas raho sath raho

aur ye ehsas rahe

main ke azad hun jine ke liye

aur zinda hun khud apne andar

apni hi zat mein tabinda hun

apni har sans pe qabza hai mira

apni pakiza tamannaon ki takmil ka haq hai mujh ko

apne maasum se jazbat ki tarsil ka haq hai mujh ko

ye zamin meri bhi ye dasht-o-chaman mere bhi

sirf angan hi nahin koh-o-daman mere bhi

mah-o-anjum bhi mire nila tabaq mera bhi

jitna un par hai tumhara wahi haq mera bhi

shart bas ye hai

ke tum sath raho pas raho

meri har marzi mein shamil ho tumhari marzi

meri har sans ki shahid hun tumhari sansen

mere har raz ki hasil ho tumhari dharkan

aur ham ek hi zanjir mein pabasta hun