وہ لحن جو صدیوں صدیوں تک

وہ لحن جو صدیوں صدیوں تک

انسان کے دل کی دھڑکن تھا

اس لحن کا جادو ٹوٹ گیا

فردوس کے نغمے خواب الست

عقبیٰ کی کہانی نقش کہن

کہسار پہ بادل سرگرداں

افلاک کے قیدی شمس و قمر

تاریخ نوائے پارینہ

مذہب کی روایت فرسودہ

اخلاق کی قدریں چکنا چور

تہذیب کے مندر بوسیدہ

فطرت کا سہارا کیا چھوٹا

ہر رشتۂ ماضی چھوٹ گیا

سنسان گزر گاہوں پر

اب موت کا ڈمرو بجتا ہے

دھرتی کا مسافر بے چارہ

حیران و پریشاں سحر زدہ

منزل کی طلب میں آوارہ

سجدے کے لئے پتھر بھی نہیں

آنسو کے لئے دامن تو کجا

جینے کے لئے لازم ہے اسے

کچھ تازہ جنوں تخلیق کرے

تسکین جگر پانے کے لئے

رشتوں کی نئی تعمیر کرے

جس پیڑ کا پھل کھایا تھا کبھی

اس پھل کے دام چکانا ہے

گو ہاتھ میں ہے اب لوح و قلم

تحریر کا فن اپنانا ہے

ابواب کتاب ہستی کو

تشکیل کا مقصد پانا ہے

wo lahn jo sadiyon sadiyon tak

insan ke dil ki dharkan tha

is lahn ka jadu tut gaya

firdaus ke naghme khwab alast

uqba ki kahani naqsh-e-kuhan

kohsar pe badal sargardan

aflak ke qaidi shams-o-qamar

tarikh nawa-e-parina

mazhab ki riwayat farsuda

akhlaq ki qadren chukna chur

tahzib ke mandir bosida

fitrat ka sahara kya chhota

har rishta-e-mazi chhut gaya

sunsan guzar gahon par

ab maut ka damru bajta hai

dharti ka musafir be chara

hairan-o-pareshan sehr zada

manzil ki talab mein awara

sajde ke liye patthar bhi nahin

ansu ke liye daman to kuja

jine ke liye lazim hai use

kuchh taza junun takhliq kare

taskin-e-jigar pane ke liye

rishton ki nai taamir kare

jis per ka phal khaya tha kabhi

is phal ke dam chukana hai

go hath mein hai ab lauh-o-qalam

tahrir ka fan apnana hai

abwab kitab-e-hasti ko

tashkil ka maqsad pana hai