اوروں سے الگ دنیا سے جدا

اوروں سے الگ دنیا سے جدا

یکتائے زمانہ ہوں گویا

آپ اپنی خودی کا مظہر ہوں

نقاش ازل کا شہ پارہ

جس سوچ میں ڈوبی رہتی ہوں

سب لوگ اسے کیا جانیں

غم اور خوشی کا پیمانہ

اوروں سے ہے یکسر بیگانہ

کچھ رنگ مرے محبوب نظر

کچھ شعر مرے تسکین جگر

کچھ راگ ہیں ایسے

جو روح کے بربط پر بجتے ہیں

خوابوں کے لرزتے سائے ہیں

جذبوں کے دہکتے انگارے

ان انگاروں کی حدت سے

احساس کا تابش ملتی ہے

احساس کی تابش میری ہے

ناکام ارادے ٹوٹے ارماں

تقدیر کے ہاتھوں نوحہ کناں

خواہش کے سمندر طوفانی

کشتی کو ڈبوئے دیتے ہیں

کشتی کی تباہی میری ہے

اس درد کا درماں میرا ہے

اس زخم کی شدت میری ہے

سنسان اندھیری راتوں میں

تنہائی کی مشعل جلتی ہے

صبحوں کی دمکتی پیشانی

شاہین نظر کی منزل ہے

اس رات کی وحشت میری ہے

اس صبح کی قربت میری ہے

وجدان خودی کے یکتارے پر

ہر طرز نئی ہر راگ جدا

مجھ سا اس دنیا میں

کوئی بھی نہیں ہے میرے سوا

اس سوچ کی لذت میری ہے

auron se alag duniya se juda

yakta-e-zamana hun gawayya

ap apni khudi ka mazhar hun

naqqash-e-azal ka shah para

jis soch mein dubi rahti hun

sab log use kya janen

gham aur khushi ka paimana

auron se hai yaksar begana

kuchh rang mire mahbub-e-nazar

kuchh sher mire taskin-e-jigar

kuchh rag hain aise

jo ruh ke barbat par bajte hain

khwabon ke larazte sae hain

jazbon ke dahakte angare

in angaron ki hiddat se

ehsas ka tabish milti hai

ehsas ki tabish meri hai

nakam irade tute arman

taqdir ke hathon nauha kunan

khwahish ke samundar tufani

kashti ko duboe dete hain

kashti ki tabahi meri hai

is dard ka darman mera hai

is zakhm ki shiddat meri hai

sunsan andheri raton mein

tanhai ki mashal jalti hai

subhon ki damakti peshani

shahin nazar ki munzzal hai

is rat ki wahshat meri hai

is subh ki qurbat meri hai

wijdan khudi ke yaktare par

har tarz nai har rag juda

mujh sa is duniya mein

koi bhi nahin hai mere siwa

is soch ki lazzat meri hai