ٹھکانا ہو نہ ہو پھر بھی ٹھکانا ڈھونڈ لیتے ہیں

ٹھکانا ہو نہ ہو پھر بھی ٹھکانا ڈھونڈ لیتے ہیں

قفس میں رہ کے بھی ہم آشیانہ ڈھونڈ لیتے ہیں

کتاب دل میں وہ غم کو چھپا لیں گے تو کیا ہوگا

مگر ہم درد و غم کا ہر خزانہ ڈھونڈ لیتے ہیں

کبھی ان کو سہارے کی ضرورت ہی نہیں پڑتی

پرندے خود بہ خود اپنا ٹھکانا ڈھونڈ لیتے ہیں

زمانے کی نظر میں قطرۂ شبنم سہی لیکن

کچھ ایسے ہیں جو اشکوں میں فسانہ ڈھونڈ لیتے ہیں

غذا ہنسوں کو موتی کی کوئی لا کر نہیں دیتا

وہ خود سیپوں کے اندر اپنا دانہ ڈھونڈ لیتے ہیں

مری تنہائیوں کا ذکر جب ان تک نہیں پہنچا

تو کس کی رہبری سے وہ ٹھکانا ڈھونڈ لیتے ہیں

جب ان کا نام اپنی روح میں گدوا لیا سوامیؔ

تو پھر کیوں ترک الفت کا بہانہ ڈھونڈ لیتے ہیں

thikana ho na ho phir bhi thikana dhund lete hain

qafas mein rah ke bhi ham ashiyana dhund lete hain

kitab-e-dil mein wo gham ko chhupa lenge to kya hoga

magar ham dard-o-gham ka har khazana dhund lete hain

kabhi un ko sahare ki zarurat hi nahin parti

parinde khud ba khud apna thikana dhund lete hain

zamane ki nazar mein qatra-e-shabnam sahi lekin

kuchh aise hain jo ashkon mein fasana dhund lete hain

ghiza hanson ko moti ki koi la kar nahin deta

wo khud sipon ke andar apna dana dhund lete hain

miri tanhaiyon ka zikr jab un tak nahin pahuncha

to kis ki rahbari se wo thikana dhund lete hain

jab un ka nam apni ruh mein gidwa liya suami

to phir kyun tark-e-ulfat ka bahana dhund lete hain