بہار آئے گی پھوٹے گی شاخ سے کونپل

بہار آئے گی پھوٹے گی شاخ سے کونپل

شکست برگ خزاں سے یقین ہوتا ہے

جو تم ہو ساتھ تو محسوس ہو رہا ہے مجھے

خزاں نصیب چمن بھی حسین ہوتا ہے

ہتھیلیوں سے حنا تک ابھی نہ چھوٹی تھی

گلے کے پھول بھی باسی نہ ہونے پائے تھے

کہ وہ حسین و جواں سال خواب ٹوٹ گئے

سہاگ رات جو افشاں میں جگمگائے تھے

زمانہ کوکھ جلی کہہ رہا ہے کہنے دو

تمہارے ہاتھ میں قسمت کا فیصلہ تو نہیں

تمہارا کام ہے پھولوں کی آرزو کرنا

تمہارے بس میں بہاروں کا قافلہ تو نہیں

نفس نفس پہ یہ احساس تیرگی کیسا

پلک پلک میں ستارے پرو رہی ہو کیوں

تمہیں تمام چمن میں نے سونپ رکھا ہے

تم اک کلی کے لیے جان کھو رہی ہو کیوں

غریب قوم کے یہ ہونہار شہزادے

تم اپنے پیار کی رعنائیاں انہیں دے دو

تم اپنے دل کی محبت بکھیر دو ان پر

تم اپنی روح کی تنہائیاں انہیں دے دو

کہیں کھلے ہوں مگر کتنے پیارے پیارے ہیں

یہ پھول اپنے نہیں ہیں مگر ہمارے ہیں

bahar aegi phutegi shakh se konpal

shikast barg-e-khizan se yaqin hota hai

jo tum ho sath to mahsus ho raha hai mujhe

khizan nasib-e-chaman bhi hasin hota hai

hatheliyon se hina tak abhi na chhoti thi

gale ke phul bhi basi na hone pae the

ke wo hasin-o-jawan sal khwab tut gae

suhag rat jo afshan mein jagmagae the

zamana kokh jali kah raha hai kahne do

tumhare hath mein qismat ka faisla to nahin

tumhara kam hai phulon ki arzu karna

tumhare bas mein baharon ka qafila to nahin

nafas nafas pe ye ehsas tirgi kaisa

palak palak mein sitare piro rahi ho kyun

tumhen tamam chaman main ne saunp rakha hai

tum ik kali ke liye jan kho rahi ho kyun

gharib qaum ke ye honahar shahzade

tum apne pyar ki raanaiyan unhen de do

tum apne dil ki mohabbat bikher do un par

tum apni ruh ki tanhaiyan unhen de do

kahin khule hun magar kitne pyare pyare hain

ye phul apne nahin hain magar hamare hain