در و دیوار پہ ہجرت کے نشاں دیکھ آئیں

در و دیوار پہ ہجرت کے نشاں دیکھ آئیں

آؤ ہم اپنے بزرگوں کے مکاں دیکھ آئیں

اپنی قسمت میں لکھے ہیں جو وراثت کی طرح

آؤ اک بار وہ زخم دل و جاں دیکھ آئیں

آؤ بھیگی ہوئی آنکھوں سے پڑھیں نوحۂ دل

آؤ بکھرے ہوئے رشتوں کا زیاں دیکھ آئیں

جس سے ٹکرا کے گرے تھے کبھی ارباب خرد

آؤ نزدیک سے وہ سنگ گراں دیکھ آئیں

وقت جاتے ہوئے کیا لکھ گیا پیشانی پر

آؤ آشفتگیٔ عہد رواں دیکھ آئیں

ٹوٹا ٹوٹا ہوا دل لے کے پھریں گلیوں میں

کچی مٹی کے کھلونوں کی دکاں دیکھ آئیں

روشنی کے کہیں آثار تو باقی ہوں گے

آؤ پگھلی ہوئی شمعوں کا دھواں دیکھ آئیں

جن درختوں کے تلے رقص صبا ہوتا تھا

سوکھے پتوں کا برسنا بھی وہاں دیکھ آئیں

اڑ رہے ہوں گے کہیں جھنڈ ابابیلوں کے

آؤ سنسان دریچوں کا سماں دیکھ آئیں

اب فرشتوں کے سوا کوئی نا آتا ہوگا

کون دیتا ہے خرابے میں اذاں دیکھ آئیں

مدتوں بعد مہاجر کی طرح آئے ہیں

روٹھ جائے نہ کھنڈر آؤ میاں دیکھ آئیں

dar-o-diwar pe hijrat ke nishan dekh aen

ao ham apne buzurgon ke makan dekh aen

apni qismat mein likhe hain jo wirasat ki tarah

ao ik bar wo zakhm-e-dil-o-jan dekh aen

ao bhigi hui ankhon se parhen nauha-e-dil

ao bikhre hue rishton ka ziyan dekh aen

jis se takra ke gire the kabhi arbab-e-khirad

ao nazdik se wo sang-e-giran dekh aen

waqt jate hue kya likh gaya peshani par

ao ashuftagi-e-ahd-e-rawan dekh aen

tuta tuta hua dil le ke phiren galiyon mein

kachchi mitti ke khilaunon ki dukan dekh aen

raushni ke kahin asar to baqi honge

ao pighli hui shamon ka dhuan dekh aen

jin darakhton ke tale raqs-e-saba hota tha

sukhe patton ka barasna bhi wahan dekh aen

ur rahe honge kahin jhund ababilon ke

ao sunsan darichon ka saman dekh aen

ab farishton ke siwa koi na ata hoga

kaun deta hai kharabe mein azan dekh aen

muddaton baad muhajir ki tarah ae hain

ruth jae na khandar ao miyan dekh aen