خاک پر گر کے لہو کون و مکاں تک پہنچا

خاک پر گر کے لہو کون و مکاں تک پہنچا

روشنی بن کے مہ و کاہکشاں تک پہنچا

عرش اعظم کے پرے لوح و قلم سے آگے

کربلا سے یہ لہو جانے کہاں تک پہنچا

یہ لہو بن کے جلا راہ وفا میں قندیل

کارواں مرحلۂ عزم جواں تک پہنچا

تازگی بن کے رگ لالہ و گل میں دوڑا

ابر بن بن کے بیابان تپاں تک پہنچا

یہ لہو چھیڑ گیا سلسلۂ دار و رسن

یہ لہو آگ کی صورت رگ جاں تک پہنچا

جل گئی شمع اندھیروں کا جگر چاک ہوا

یہ لہو وقت کی لہروں پہ جہاں تک پہنچا

انقلابات کی تاریخ کا عنواں بن کر

یہ لہو قتل گہہ عصر رواں تک پہنچا

چارہ گر آئے بہت کوئی مسیحا نہ ہوا

سینۂ ارض کے زخموں کا مداوا نہ ہوا

کربلا آج بھی برپا ہے بہ انداز دگر

دشت میں رقص شہیداں کا تماشہ نہ ہوا

بند ہے آج بھی کتنوں کے لئے نہر فرات

معرکہ کوئی بظاہر لب دریا نہ ہوا

زینبیں اپنے گھروں میں ہیں ردا سے محروم

دشت و کہسار میں خیمہ کہیں برپا نہ ہوا

رات پیتی ہی رہی چاند ستاروں کا لہو

وقت کی تیرہ فضاؤں میں اجالا نہ ہوا

کون سا وقت ہے پھر روح کی بیداری کا

زخم احساس اگر آج بھی تازا نہ ہوا

دل کو بیدار کریں روح کو بے باک کریں

عصر حاضر کے یزیدوں کی قبا چاک کریں

اشک بے سود رہے کشت تمنا کے لیے

خون دل خون جگر سے اسے نمناک کریں

موج خوں غازۂ رخسار امم ہوتی ہے

آؤ اب وقت کی آواز کا ادراک کریں

زیر محراب نہیں ہوتی محبت کی نماز

سایۂ دار میں اک سجدۂ بے باک کریں

khak par gir ke lahu kaun-o-makan tak pahuncha

raushni ban ke mah-o-kahkashan tak pahuncha

arsh-e-aazam ke pare lauh-o-qalam se age

karbala se ye lahu jane kahan tak pahuncha

ye lahu ban ke jala rah-e-wafa mein qindil

karwan marhala-e-azm-e-jawan tak pahuncha

tazgi ban ke rag-e-lala-o-gul mein daura

abr ban ban ke bayaban tapan tak pahuncha

ye lahu chher gaya silsila-e-dar-o-rasan

ye lahu ag ki surat rag-e-jan tak pahuncha

jal gai shama andheron ka jigar chak hua

ye lahu waqt ki lahron pe jahan tak pahuncha

inqilabat ki tarikh ka unwan ban kar

ye lahu qatl gah asr-e-rawan tak pahuncha

chara gar ae bahut koi masiha na hua

sina-e-arz ke zakhmon ka mudawa na hua

karbala aj bhi barpa hai ba andaz-e-digar

dasht mein raqs-e-shahidan ka tamasha na hua

band hai aj bhi kitnon ke liye nahr-e-furat

marka koi bazahir lab-e-dariya na hua

zainbin apne gharon mein hain rida se mahrum

dasht-o-kohsar mein khema kahin barpa na hua

rat piti hi rahi chand sitaron ka lahu

waqt ki tira fazaon mein ujala na hua

kaun sa waqt hai phir ruh ki bedari ka

zakhm-e-ehsas agar aj bhi taza na hua

dil ko bedar karen ruh ko be bak karen

asr-e-hazir ke yazidon ki qaba chak karen

ashk-e-be sud rahe kisht-e-tamanna ke liye

khun-e-dil khun-e-jigar se use namnak karen

mauj-e-khun ghaza-e-rukhsar-e-umam hoti hai

ao ab waqt ki awaz ka idrak karen

zer-e-mehrab nahin hoti mohabbat ki namaz

saya-e-dar mein ik sajda-e-be bak karen