نہیں میرا آنچل میلا ہے

نہیں میرا آنچل میلا ہے

اور تیری دستار کے سارے پیچ ابھی تک تیکھے ہیں

کسی ہوا نے ان کو اب تک چھونے کی جرأت نہیں کی ہے

تیری اجلی پیشانی پر

گئے دنوں کی کوئی گھڑی

پچھتاوا بن کے نہیں پھوٹی

اور میرے ماتھے کی سیاہی

تجھ سے آنکھ ملا کر بات نہیں کر سکتی

اچھے لڑکے

مجھے نہ ایسے دیکھ

اپنے سارے جگنو سارے پھول

سنبھال کے رکھ لے

پھٹے ہوئے آنچل سے پھول گر جاتے ہیں

اور جگنو

پہلا موقع پاتے ہی اڑ جاتے ہیں

چاہے اوڑھنی سے باہر کی دھوپ کتنی ہی کڑی ہو!

nahin mera anchal maila hai

aur teri dastar ke sare pech abhi tak tikhe hain

kisi hawa ne un ko ab tak chhune ki jurat nahin ki hai

teri ujli peshani par

gae dinon ki koi ghari

pachhtawa ban ke nahin phuti

aur mere mathe ki siyahi

tujh se ankh mila kar bat nahin kar sakti

achchhe larke

mujhe na aise dekh

apne sare jugnu sare phul

sambhal ke rakh le

phate hue anchal se phul gir jate hain

aur jugnu

pahla mauqaa pate hi ur jate hain

chahe orhni se bahar ki dhup kitni hi kari ho!