تم مجھ کو گڑیا کہتے ہو
Parveen Shakir (1952–1994)تم مجھ کو گڑیا کہتے ہو
ٹھیک ہی کہتے ہو!
کھیلنے والے سب ہاتھوں کو میں گڑیا ہی لگتی ہوں
جو پہنا دو مجھ پہ سجے گا
میرا کوئی رنگ نہیں
جس بچے کے ہاتھ تھما دو
میری کسی سے جنگ نہیں
سوچتی جاگتی آنکھیں میری
جب چاہے بینائی لے لو
کوک بھرو اور باتیں سن لو
یا میری گویائی لے لو
مانگ بھرو سیندور لگاؤ
پیار کرو آنکھوں میں بساؤ
اور پھر جب دل بھر جائے تو
دل سے اٹھا کے طاق پہ رکھ دو
تم مجھ کو گڑیا کہتے ہو
ٹھیک ہی کہتے ہو!
tum mujh ko guriya kahte ho
thik hi kahte ho!
khelne wale sab hathon ko main guriya hi lagti hun
jo pahna do mujh pe sajega
mera koi rang nahin
jis bachche ke hath thama do
meri kisi se jang nahin
sochti jagti ankhen meri
jab chahe binai le lo
kok bharo aur baten sun lo
ya meri goyai le lo
mang bharo sendur lagao
pyar karo ankhon mein basao
aur phir jab dil bhar jae to
dil se utha ke taq pe rakh do
tum mujh ko guriya kahte ho
thik hi kahte ho!