بہت عزیز ہے مجھ کو وطن عزیز وطن

بہت عزیز ہے مجھ کو وطن عزیز وطن

وطن کی خاک ہے عنبر مری نگاہوں میں

وطن کے قطرے سمندر مری نگاہوں میں

وطن کے ذرے ہیں گوہر مری نگاہوں میں

وطن کے خار گل تر مری نگاہوں میں

بہت عزیز ہے مجھ کو وطن عزیز وطن

مری نگاہوں میں وقعت ہے طور سینا کی

مری نگاہوں میں عظمت ہے عرش عالی کی

مری نگاہوں میں عزت ہے ساری دنیا کی

مگر ہے خاک وطن سرمہ چشم بینا کی

بہت عزیز ہے مجھ کو وطن عزیز وطن

مرے وطن میں ہے گوتم کا فیض روحانی

مرے وطن میں ہے گیتا کی شمع نورانی

مرے وطن میں ہے گنگا کی پاک دامانی

مرے وطن میں ہے نور ازل کی ارزانی

بہت عزیز ہے مجھ کو وطن عزیز وطن

وطن کی گرد وطن کی زمیں وطن کی ہوا

وطن کی شام وطن کی سحر وطن کی فضا

وطن کے کوچے وطن کے چمن وطن کی ادا

ہے یاد ان کی علاج اپنے رنج غربت کا

بہت عزیز ہے مجھ کو وطن عزیز وطن

بلند رتبۂ گردوں سے کار گاہ وطن

بلند حوصلۂ دل سے بارگاہ وطن

کلیم دل کے لئے طور جلوہ گاہ وطن

نشاط روح کی ضامن ہے سجدہ گاہ وطن

بہت عزیز ہے مجھ کو وطن عزیز وطن

bahut aziz hai mujh ko watan aziz watan

watan ki khak hai ambar miri nigahon mein

watan ke qatre samundar miri nigahon mein

watan ke zarre hain gauhar miri nigahon mein

watan ke khar-e-gul-e-tar miri nigahon mein

bahut aziz hai mujh ko watan aziz watan

miri nigahon mein waqat hai tur-e-sina ki

miri nigahon mein azmat hai arsh ali ki

miri nigahon mein izzat hai sari duniya ki

magar hai khak-e-watan surma chashm-e-bina ki

bahut aziz hai mujh ko watan aziz watan

mire watan mein hai gotam ka faiz ruhani

mire watan mein hai gita ki shama nurani

mire watan mein hai ganga ki pak damani

mire watan mein hai nur-e-azal ki arzani

bahut aziz hai mujh ko watan aziz watan

watan ki gard-e-watan ki zamin watan ki hawa

watan ki sham-e-watan ki sahar watan ki faza

watan ke kuche watan ke chaman watan ki ada

hai yad un ki ilaj apne ranj ghurbat ka

bahut aziz hai mujh ko watan aziz watan

buland rutba-e-gardun se kar gah-e-watan

buland hausla-e-dil se bargah-e-watan

kalim dil ke liye tur jalwa gah-e-watan

nishat-e-ruh ki zamin hai sajda gah-e-watan

bahut aziz hai mujh ko watan aziz watan