چلتے چلتے مری نیند ٹوٹی تو دیکھا

چلتے چلتے مری نیند ٹوٹی تو دیکھا

ہر اک سمت تاریک اسرار

پتھر کی مانند

رستے کی دیوار تھے

پھر ستاروں نے پیغام رفعت دیا

اور خوابوں کے جھونکے

میرے ذہن معصوم میں لہلہانے لگے

میرے پر پھڑپھڑانے لگے

پھر بھی پرواز کے واسطے میں نے جنبش جو کی

میں نے دیکھا کہ بے چارگی

میرے قدموں کی زنجیر بننے لگی

میں فقط ایک بے بال و پر

تنگ و تاریک غاروں کا انسان تھا

پھر ستاروں نے آواز دی

یہ ستارے جو انساں کی آواز ہیں

یہ ستارے جو انسان کی روح پرواز ہیں

ان کی آواز پر میں نے جنبش جو کی

میری زنجیر ٹوٹی

مرے دیوتا مجھ سے سہمے ہوئے

مجھ سے کچھ دور پر دست بستہ کھڑے تھے

میں آگے بڑھا

میری یلغار سے بحر و دشت و جبل زر اگلنے لگے

میں بہت خوش ہوا

اور اس زر سے اک آسماں تک پہنچنے کی سیڑھی بنانے لگا

ایک زریں چمکتا ہوا زینۂ آسمانی

اور آگے بڑھا

اب مرے ہاتھ دھرتی سے اوپر فضاؤں میں لہرا رہے تھے

مگر وہ ستارے بہت دور تھے میرا زینہ بہت مختصر تھا

تو پھر

میں نے انکار کے پر لگا کر جو پرواز کی

میرا زینہ ہی مجھ سے الجھنے لگا

اور غاروں کے وہ دیوتا

طنز سے مسکرانے لگے

پھر ستاروں نے آواز دی

اپنے ہاتھوں سے خود اپنے زینے کو نیچے گرا کر بڑھا

میں فضا میں اڑا

اور وہ وقت بھی آ گیا

جب حدود ہوا

میری پرواز کی راہ میں ایک دیوار سی بن گئی

دیوتا مسکرانے لگے

پھر ستاروں نے آواز دی

میری ہمت بڑھی

اپنے خوابوں کی دنیا سمیٹے ہوئے

میں بڑے عزم کے ساتھ دھرتی پر اترا

خلاؤں میں پرواز کی

آج پہلا قدم چاند پر ہے مگر

ہیں ستارے ابھی دور تاریکیوں میں کہیں جلوہ گر

ان کی آواز گیتوں کے سرگم میں بھر لی مگر

اب وہی میرے پاؤں کی زنجیر ہیں

ایک ضدی سی زنجیر ہیں

دیوتاؤں نے جس کو بنایا مجھے روکنے کے لئے

اور ستاروں نے آواز دی ہے سدا

میرے خوابوں کا لشکر امیدوں کا سورج لیے

میرے گیتوں کی دنیا میں نغموں کے بادل

پر اڑنے لگا

اور یہ بادل چمکنے لگے کہکشاں کی طرح

اور اب دیوتا

تنگ و تاریک غاروں میں خود کو چھپانے لگے

chalte chalte miri nind tuti to dekha

har ik samt tarik asrar

patthar ki manind

raste ki diwar the

phir sitaron ne paigham rifat diya

aur khwabon ke jhonke

mere zehn maasum mein lahlahane lage

mere par pharpharane lage

phir bhi parwaz ke waste main ne jumbish jo ki

main ne dekha ke be chargi

mere qadmon ki zanjir banne lagi

main faqat ek be bal-o-par

tang-o-tarik gharon ka insan tha

phir sitaron ne awaz di

ye sitare jo insan ki awaz hain

ye sitare jo insan ki ruh parwaz hain

un ki awaz par main ne jumbish jo ki

meri zanjir tuti

mire dewta mujh se sahme hue

mujh se kuchh dur par dast basta khare the

main age barha

meri yalghar se bahr-o-dasht-o-jabal zar ugalne lage

main bahut khush hua

aur is zar se ik asman tak pahunchne ki sirhi banane laga

ek zarrin chamakta hua zina-e-asmani

aur age barha

ab mire hath dharti se upar fazaon mein lahra rahe the

magar wo sitare bahut dur the mera zina bahut mukhtasar tha

to phir

main ne inkar ke par laga kar jo parwaz ki

mera zina hi mujh se ulajhne laga

aur gharon ke wo dewta

tanz se muskurane lage

phir sitaron ne awaz di

apne hathon se khud apne zine ko niche gira kar barha

main faza mein ura

aur wo waqt bhi a gaya

jab hudud hua

meri parwaz ki rah mein ek diwar si ban gai

dewta muskurane lage

phir sitaron ne awaz di

meri himmat barhi

apne khwabon ki duniya samete hue

main bare azm ke sath dharti par utra

khalaon mein parwaz ki

aj pahla qadam chand par hai magar

hain sitare abhi dur tarikiyon mein kahin jalwa gar

un ki awaz giton ke sargam mein bhar li magar

ab wahi mere paon ki zanjir hain

ek ziddi si zanjir hain

dewtaon ne jis ko banaya mujhe rokne ke liye

aur sitaron ne awaz di hai sada

mere khwabon ka lashkar ummidon ka suraj liye

mere giton ki duniya mein naghmon ke badal

par urne laga

aur ye badal chamakne lage kahkashan ki tarah

aur ab dewta

tang-o-tarik gharon mein khud ko chhupane lage