جی میں آتا ہے ہم بھی اڑانیں بھریں

جی میں آتا ہے ہم بھی اڑانیں بھریں

آسانوں کی نیلی حدوں کو چھوئیں

ساگروں اور ندیوں میں غلطاں رہیں

شہر میں گاؤں میں جنگلوں میں پھریں

جی میں آتا ہے پھولوں کی رنگت

کھیتوں کا حسیں بانکپن

بانسری کی وہ تانیں

پپیہوں کے بول

رقص کرتی ہوئی ان فضاؤں کی مدہوشیاں

کارخانوں کی ہنگامہ آرائیاں

بھوکے پیاسے محلوں کی ویرانیاں

درد کی حسرتوں کی یہ تاریکیاں

ساری محرومیاں ساری مجبوریاں

اپنی ہستی میں بھر لیں

صبح دم نرم و تازہ بہاروں کے مسرور جھونکے

ہم کو تاریک اور غم زدہ رات کی

الجھنوں وحشتوں سے دلا دیں نجات

جن میں صدیوں سے ہے قید اپنی حیات

نئی و تازہ ہواؤں کے مسرور جھونکوں میں شکتی کہاں

کہ طوق و دار و رسن سے وہ آزاد کر دیں

اپنی آزادی ہم کو ہی پانی پڑے گی

جان کی دل کی بازی لگانی پڑے گی

ذمہ داری اہم ہے اٹھانی پڑے گی

آج دیوار زنداں ڈھانی پڑے گی

اپنی سانسوں کی گرمی سے

خوابوں کی لو سے

اپنے اشکوں کے زہراب سے

اپنے ارمانوں کی لمحہ لمحہ دہکتی ہوئی آگ سے

طوق کو اور زنجیر کو

قید کو اور جلاد کو

ظالموں کی کمیں گاہ کو

ان اندھیروں کے دہشت زدہ اونچے اونچے مناروں کو

پگھلا دیں ڈھا دیں چلو خاک کر دیں

ہر طرف ایک سرخی سی چھا جائے گی

زندگی اپنی منزل کو پا جائے گی

ji mein ata hai ham bhi uranen bharen

asanon ki nili hadon ko chhuen

sagaron aur nadiyon mein ghaltan rahen

shahr mein gaon mein jangalon mein phiren

ji mein ata hai phulon ki rangat

kheton ka hasin bankpan

bansuri ki wo tanen

papihon ke bol

raqs karti hui un fazaon ki madhoshiyan

karkhanon ki hangama araiyan

bhuke pyase mahlon ki wiraniyan

dard ki hasraton ki ye tarikiyan

sari mahrumiyan sari majburiyan

apni hasti mein bhar len

subh dam narm-o-taza baharon ke masrur jhonke

ham ko tarik aur gham zada rat ki

uljhanon wahshaton se dila den najat

jin mein sadiyon se hai qaid apni hayat

nai-o-taza hawaon ke masrur jhonkon mein shakti kahan

ke tauq-o-dar-o-rasan se wo azad kar den

apni azadi ham ko hi pani paregi

jan ki dil ki bazi lagani paregi

zimma dari aham hai uthani paregi

aj diwar-e-zindan dhani paregi

apni sanson ki garmi se

khwabon ki lau se

apne ashkon ke zahrab se

apne armanon ki lamha lamha dahakti hui ag se

tauq ko aur zanjir ko

qaid ko aur jallad ko

zalimon ki kamin gah ko

in andheron ke dahshat zada unche unche manaron ko

pighla den dha den chalo khak kar den

har taraf ek surkhi si chha jaegi

zindagi apni manzil ko pa jaegi